細個嗰時，聯想力好豐富，去親廁所，揸住卷廁紙，好想知道，沉魚落雁、花容月貌、風華絕代嘅大美人西施，究竟如廁後點樣善後。

　　中學嗰時，挑燈夜讀《神鵰俠侶》，好想知道，道行高深、不食人間煙火嘅一燈大師，見到身材惹火靚女，有無忍唔住吞口水，究竟生理心理有乜反應。

　　大學暑假，窮遊西安兵馬俑，見到浩浩蕩蕩栩栩如生嘅雕像，好想知道，睨視天下蒼生嘅秦始皇，畀徐福玩完一鑊又一鑊，喺陰間撞見閻羅王，發覺自己原來瓜咗，究竟有無驚到尿床。

　　畢業後，出席擦鞋畀面嘅周年晚宴，好想知道，台上衣冠楚楚口若懸河嘅「高層」人士，畀「高高層」照肺問候嗰時，係咪頭耷耷唔敢出聲，究竟有無面青青流冷汗。

　　細個已經明白，就算天之驕子英雄蓋世，只不過係穹蒼宇宙一粒微塵，係老母隨時大聲呼喝嘅孝順仔，老婆隨傳隨到嘅老婆奴，仔女指東指西嘅賓佬，一樣要食飯上茅廁，一樣怕死鹹鹹地，外表英明神武扮晒叉燒，掩飾唔到內裏軟弱騰雞膽小。

　　長大之後，體會到一個簡單事實，人人都係普通人，個個普通人獨一無二，都有自己優點缺點，各擅勝場。慢慢培養出無堅不摧嘅自信心同埋堅強意志，見到有人聰明能幹靚仔有米有權有勢，內心唔覺輸蝕，挺起胸膛；見到有人條件差過自己，一樣心存尊重。識得尊重自己，就識得尊重人哋，美滿人生由尊重自己獨一無二開始。

　　「老婆，你知唔知我獨一無二？」

　　「獨一無二老公，唔該洗完碗吸塵。」

轉載自: 晴報

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票