香港警察又立大功啦！一星期內連破兩單大案，先係好快咁拉到一位前科纍纍嘅癮君子，涉嫌喺九龍灣姦劫一名22歲女子，仲疑似嚇到呢名疑犯吊頸自殺。跟住就係帶晒防暴警察、警犬，一大群人上到觀塘嘅工廈，將地下樂隊嘅Live House Hidden Agenda「繩之以法」，成功捉到痛腳。大家快啲為香港警察鼓掌，一邊震懾強姦犯，一邊震懾埋香港嘅地下文化。

 

　　講返正經，強姦案疑犯懷疑自殺案就無謂評論咁多，橫掂警方製造咗一場更大嘅災難畀自己去解決，大家就慢慢睇吓佢哋未來點解畫。

 

　　Hidden Agenda事件，來港到HA表演嘅英國樂隊TTNG (This Town Need Guns) 成員被警方控以違反逗留條件，而HA負責人就被控聘請黑工。作為一個奉公守法嘅市民，我係支持政府嚴正執法架，所以警察好應該對所有工廈單位做巡查，唔爭在check埋商廈，千祈唔好漏咗任何胡亂改變用途嘅公司，一定要拘捕所有並未為外國嚟香港工作申請簽證嘅公司負責人 (包括音樂表演、拍攝、學者、外交人員、甚至嚟傾生意嘅外國人) ，一個都唔好漏呀，唔好令一眾支持政府執法嘅市民失望呀。

 

　　好荒謬呀，全部都拉晒咁香港監獄、再加香港警署所有臭格應該都逼爆晒架啦，因為走喺灰色地帶嘅人大有人在。

 

　　無錯，HA今次係被政府捉到正，因為佢哋無為TTNG成員申請工作簽證。但首先，要申請成功，勞工處同入境處會審核該外國人「工作」嘅場所安唔安全，合唔合規格，而由於HA係冇公共娛樂場所牌照，所以幾乎肯定政府係唔會批准相關工作簽證。

 

　　據了解，HA只能夠成功申請到食品加工廠牌照，而要搞音樂表演，係需要攞到上面提到嘅公眾娛樂場所牌照，進而，如要符合牌照需求，就需要加建一系列嘅安全設備，包括消防、衛生、結構等等，涉及多個政府部門，單係計所需金錢，HA呢類小型團體已經無法負擔。

 

　　即使假設佢哋有足夠金錢做改建，又面對另一個死症，就係HA係開喺工廈，而工廈地契列明租戶不能從事工業以外嘅用途，亦即從一開始，佢哋已經唔能夠合法咁去經營。有冇可以合法經營嘅場地畀佢租用？Yes and no. 商廈係可以租用，但係天價租金已經抹殺咗小型團體生存空間，亦因為會有所謂「噪音」問題而被封殺。呢類小型表演場地喺香港係無生存空間，咁剩返嘅就係一堆只有大型音樂團體先有能力負擔嘅政府場地及展覽場館，畀主流音樂人表演，地下樂隊？你一係變主流，一係自己摺埋。

 

　　歸根結底，就係因為band sound不甘做一個乖孩子，所以畀香港呢個對「乖」有迷信嘅社會趕盡殺絕，而香港政府一套家長式管治嘅思維，當然就好樂意擔當劊子手。而喺政府眼中，band sound唔係唯一嘅壞孩子，所有唔想喺體制內做「登記」、「註冊」嘅文化同藝術人，都係唔聽話嘅，簡單到喺公共草地想攞起樂器唱隻歌，都會面對保安人員嘅阻撓。

 

　　香港政府要將文化空間嘅管理權牢牢咁揸實，令到所有文化人，都需要服膺於政府嘅嗰一套規條。

 

　　不過呢啲說話，對於離地離到上外太空嘅香港高官，係一啲作用都冇。佢哋連地上面企喺度嘅人都睇唔到，仲點會去理會「地下」世界發生緊啲咩事？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情