一部電腦，用咗5年。本身佢嘅零件已經係滿布鏽跡。如果只係換咗一粒螺絲、一個火牛，其他所有零件只係輕輕掃吓塵，我哋能唔能夠稱佢係一部新電腦？你會唔會Expect呢部電腦會行得快好多，表現比「舊電腦」超卓10倍？一個管治團隊，只係有一個「新面孔」，其餘全部都係現有團隊入面留任或者「有幸」升職，又稱唔稱得上係一個新團隊？

　　林鄭就話畀你聽，佢就係一個咁樣嘅團隊，而呢個團隊係好「新」嘅。林鄭喺6月21號率領新團隊嘅記者會，就畀咗答案大家。佢先後三次提到佢嘅「三新」：「管治新風格」、「 政府新角色」、「理財新哲學」，係佢自今年2月發表競選政綱摘要版時提出。

　　「三新」當中，本來林鄭係最強調「理財新哲學」，因為呢個係佢對付曾俊華嘅一個「強力武器」，矢志要將曾俊華任內守財嘅風格換走，從而達成一種新嘅用錢態度。而做後備財爺做咗4年嘅陳茂波走馬上任，林鄭將「理財新哲學」更多咁擺喺口邊，而佢當選後亦都已經有各路人嘅報道，指出波叔唔係林鄭心中理想嘅財爺人選。所以，林鄭曾經豪言要「財金班底大換血」，但係，佢同佢嘅前上司一樣，上任前都換唔到一個心儀嘅人揸住盤數，最後，佢已經愈嚟愈少提呢套「理財新哲學」，波叔亦都喜得連任機會，有得繼續住佢豪花數百萬裝修嘅官邸。

 　　相反，「官治新風」就成為咗林鄭最常掛喺口邊嘅口號。點解要咁強調呢一新？只因佢要擺脫689 2.0呢個稱號，仲記得舊年梁振英脫腳翌日，12月10號，佢表示自己「不得不考慮參選」時，最大嘅註腳，就係佢要延續梁振英嘅施政理念。但慢慢發現上錯船，原來自己可能只能成為傀儡，連梁振英嗰種鬥爭為綱嘅治風格都要延續。

　　佢每強調一次，就越顯示佢希望搣甩689呢個負資產。亦因此，喺選舉時力撐鬍鬚嘅溫和民主派，尤其是老一輩嗰班，就逐步跟隨林鄭嘅旋律，收起選舉前對林鄭噴發嘅火焰，形成一種好似理所當然，但係同時奇奇怪怪嘅「大和解」氣氛。  

　　換新電腦，身為顧客都尚且可以揀過另一間電腦舖，買過其他零件。香港組班，經過5年來梁振英事事交權力畀中央嘅洗禮，而家就變成咗冇乜幾多零件可以揀，因為每樣嘢都要先過問「政治忠誠」，本來林鄭想搵新人去展現真正「新風」，都因為大陸畀出嚟嘅一個超高政治門檻，而變成要用一舊舊現成電池，東拼西湊呢個平均年齡58.7歲，總年齡999歲嘅政務官團隊。 

　　羅致光 作為「新」成員，一晚間轉換政治企位，成為唯一能夠畀人有啲盼望嘅焦點。但係，佢對六四嘅難言之隱，就側面咁道出咗「一國兩制」嘅死局，要過北京嗰一關，一定要放棄對於民主自由觀念嘅堅持，緊跟北京嘅政治光譜。

　　689呢個陰影，冇咁容易擺脫，考開第一嘅林鄭，係咪真係有心有力創新天，唔做2.0，堂堂正正做返1.0呢？聽住近期京官頻頻放話，以及林鄭對國教、港獨捉唔緊立場，就知道困難重重。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票