亞馬遜河似大澳

　　今日扮下旅遊達人，同大家講下巴西好玩嘅地方，話說瑪瑙斯呢個地方我哋只係逗留三日，日後真係唔知幾時會再去，但係呢度有一樣好吸引嘅嘢，就係亞馬遜河嘞，咁以往我同你都聽過呢條世界第二長嘅河流啦，但係有乜特別就真係聞名不如見面嘞，當日去到其中一條支流黑河嘅時候，我眼前嘅河景並唔係以前印象嘅兩邊樹林中間流水嘅河流仔，而係一望無際嘅海洋咁款嘅巨河，我哋坐船去到河中心一個河與河交滙嘅地方，仲見到兩隻色嘅河水份開楚河漢界嘅界線，條界線延綿數里，一邊黑色同另一邊黃色，大自然果然奇妙。

我同拍檔Gloria試過亞馬遜啲河水，真係淡嘅，哈哈！

　　有啲嘢遠睇無乜特別，近啲望清楚先知人外有人，天外有天，就好似我哋平時睇波，經過電視個熒光幕呢，好多嘢好似睇得一清二楚，特別係慢鏡重播就令到我哋個個變專家，但有啲球員嘅壓場感，唔係兜口兜面睇呢，真係唔知佢強到咁，講緊嘅係意大利嘅派路uncle，對英格蘭嗰場波，35歲嘅佢喺場中間嘅感染力，就好似一個指揮家咁，響球隊中間一路帶領住隊友嘅節奏，最得人驚係對面嘅英格蘭都比佢牽引住，真係魔術師一樣！去旅行要睇景點的話，去世界盃朝聖就係想目睹呢啲魔術師球員表演！

　　忍唔住講多兩句亞馬遜河，原來河上面有各式各樣嘅飄流村莊，上面有小型嘅社區，有士多有學校有教堂仲有餐廳添，有啲似我哋大澳咁啦，但飄流村莊係真正四面環河，與世隔絕，不過當我哋經過時，我見到其中有間屋頂有電視天線喎，世界盃都要睇嘅！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇