「蘇亞雷豬」潛水講波鬧劇

　　其實自己好心多，今次電視台出埠巴西世界杯可以話過足電視癮，講波、採訪、包故仔樣樣都做，又難得電視台又肯畀我乜都掂下，咁就何樂而不為！

 

世界杯夢想可以很大，但英軍fans要等下屆。

 

　　現場講波呢味嘢，試過真係戒唔甩條癮，能夠響球場居高臨下睇晒全場，然後快香港幾秒鐘去講場波，確實係人生一大快事。

 

　　我除咗揭幕戰，兩場準決賽同決賽都仲有機會現場講波，當然非常期待啦，最好戲碼係：乜乜對乜乜，自己填啦！

 

　　有朋友問我點解現場唔講多幾場呀，咁其實因為製作費用高昂，頭尾有四場都唔錯㗎嘞，近幾年香港電視台都已經冇咗現場講波呢項優差，今次能夠重新出發，對我哋講波嘅實在係大好消息，因為睇到同講到嘅嘢都多好多，希望球迷們都會感受到現場一樣嘅效果啦。

 

　　而呢兩日亦有好多朋友問我搞邊科，因乜上周五英格蘭對烏拉圭場波我響現場嘅報道變咗潛水咁嘅聲，喺度先同我公司嘅台前幕後拍檔say sorry，查實當日呢場我哋係預咗響現場做賽前同賽後嘅故事，但係眼見場波群情洶湧，所以同公司夾咗臨時加插一個電話phone in，為大家提供多啲現場氣氛。

 

　　賽前我哋試過響球場講電話都好地地，但到真正開波之後，現場聲浪之大，已經去到隔籬位講乜都聽唔到咁滯，所以就發生咗香港交咗畀我講，我又唔知仲響度傻下傻下自言自語嘅鬧劇，而之後又有我講緊但唔知我講乜嘅潛水聲音，只怪現場聲浪太大啦！

 

　　加上我一開始講：「蘇亞雷斯就入波！」你可以想像現場拆天咁嘅環境，所以香港球迷只聽到我最後留低嘅四個大字：「蘇亞雷『豬』！」而豬就係我！

 

轉載自晴報

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情