以為立法會主席曾鈺成一早已經將焦點轉去「做皇」，著眼出年嘅特首選舉，但作為民建聯嘅創辦人之一，又點會唔關心自己親生仔喺立法會嘅前途？

　　曾主席喺專欄以「同室操戈」為題，借老陳同老鄧嘅模擬對話，講反對派或建制派都同樣會出現陣營裏互相攻擊情況，仲提到「棄保」問題，指出每個候選人都有一套好理由，證明應該「棄他保我」，暗示任何「棄保」方案都係開玩笑。

　　曾主席有一句講得最中肯，就係各候選人要爭選票，並唔係爭政見相反人士嘅選票，因為大家嘅支持者有唔同理念，要爭一定係爭取政見相近人士，就好似激進派掘泛民嘅龍脈一樣，喺選舉論壇都係同路人互相攻擊最到肉、火花最激烈，只不過建制派礙於保持整體隊形同唔可以喺西環面前亂來，先唔會擺明互相攻擊，但暗地裏有無人界票，大家都心知肚明。

　　有建制派中人透露，曾鈺成喺選舉準備轉彎進入大直路時刻，整一篇咁嘅文章，好明顯就係提醒各建制派中人，唔好諗住打民建聯主意。民建聯各區團隊相對上係比較穩定，民調顯示大部分都穩打穩紮。相反其他「同路人」就有部分危危乎，唔排除有個別政黨已經向西環報定案，要求有餘票嘅政黨醒目，過票畀其他掹掹緊嘅建制派，以保建制得到更多直選議席。民建聯可能擔心，呢個講法真係成為西環嘅立場，對佢地選情會帶來負面影響，所以大主席曾鈺成就先行發功，封定後門。

　　不過話時話，建制派喺各區協調上面，民記都已經作出極大妥協，好似港島區咁，更加因為讓路而幾乎逼到Treegun鍾樹根真真正正「同室操戈」，既然已經做好協調，其他建制派咁快就叫告急要界票，又點會唔激到曾主席要拎金筆發文提醒大家呢？

＊編者按：2016年立法會港島選區候選名單包括：黃梓謙、劉嘉鴻、葉劉淑儀、何秀蘭、張國鈞、詹培忠、鄭錦滿、羅冠聰、沈志超、王維基、徐子見、司馬文、許智峰、陳淑莊、郭偉強。　

（名單只列出排名首位參選者姓名）

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇