今時今日，男性點樣先可以向女性突顯到自己嘅誠意？買鑽石、買手袋？太low啦！咁自己手作心意呢？又太行貨。如果好似《花樣年華》入面嘅周慕雲對蘇麗珍講：「如果我有多張船飛，你會唔會同我一齊走？」，咁就一定誠意到極啦！仲未夠？咁幫你升級至價值25萬美金嘅太空船飛點睇呢？

 

 

 

中介推25萬美金維珍太空船飛，你會唔會一齊走？

 

（SHUTTERSTOCK圖片）

 

　　早前英國維珍銀河「團結號」終於完成公司首次嘅太空飛行，標誌住商業太空旅遊已經開展第一步。說時遲那時快，有德國中介公司已經推出「維珍銀河」太空旅遊預定服務，初步預售價同市場預測一樣，價值約25萬美元（約195萬港紙）。

 

　　據中介公司表示，除左有錢之外，仲要身體健康，短期內唔可以做過手術或者發生過心臟病。因為旅途期間身體要承受好大壓力，假如突然傷口撕裂就真係無人幫到你；而上太空之前仲要接受一系列訓練，包括軌道力學、太空衣穿著等。據瞭解全球已經有600幾人已經預訂，單單呢間中介公司就有8個人落訂啦！

 

買飛難，買保險更難！

 

（SHUTTERSTOCK圖片）

 

　　你以為有錢就是任性嗎？咁你就未免太天真了，因為呢個項目係新到無朋友，首先買飛已經好難，想要去太空旅行，除左有錢仲要排下隊；其次就係全球保險業都未見過「太空旅行」嘅出現，目前係未見有相關保險產品推出，就算維珍創辦人布蘭特同亞馬遜創辦人貝索斯上太空都無人敢保，所以兩隻船如果是但一隻出事就係咁先。

 

　　咁係咪代表保險公司無太空相關保險呢？又唔係嘅，其實保險公司都有針對關於太空船同相關硬件嘅保險方案，目前市場規模大約8億美金左右；有分析人士估計，去到2030年，商業太空旅遊規模會增長至100到150億美金左右，所以市場監管機構可能要求提供相關保險，保險業都可以有項新業務發展啦！

 

上太空就可以叫「太空人」？FFA:要有足夠貢獻才可得到頭銜

 

 （SHUTTERSTOCK圖片）

 

　　咁上過太空係咪就可以叫做「太空人」呢？呢個真係好哲學問題，如果當人人都可以上太空嘅時候，究竟仲需唔需要「太空人」呢個名詞存在都係一個問題。不過，美國聯邦航空總署（FAA）最近就對呢個名詞作出修訂，其中一個定義要求係要有充足訓練及足夠嘅貢獻。

 

　　如果要被認為係「商業宇宙太空人之翼」（Commercial Space Astronaut Wings），就要有更嚴格限制，包括獲得足夠飛行員資格及訓練之餘，更要係獲認證嘅發射任務中，飛越外太空與地球大氣層嘅分界線，而期間嘅活動對公共安全或人類太空旅行安全有必要性。所以話，做個太空人都唔係咁簡單，除左有勇氣智慧之外，仲要為人類貢獻先得㗎！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇