《Online有話兒》美債違約風險加上停擺危機，金融海嘯再度來臨？

 

　　中國恒大危機先稍微叫緩和一下，呢次又到美國再出事端，包括當地政府可能會係10月份因為資金耗盡出現停擺機會，同時如果國會唔提高債務上限，財政部就會係10月18日耗盡現金，美國就有機會出現史上首次指債務違約。雙重消息夾擊下，美股道指隔晚就大跌近六百點，而呢次危機會唔會係入市好機會呢？定係金融海嘯再到襲擊？ 

（Shutterstock圖片）

 

兩黨未傾好，無法通過最新撥款，美政府最快「十一」停擺

 

　　美國兩黨目前仍未就新財年預算同埋暫停債務上限法案達成一致，係早前參議院投票入面，只係得到50張贊成票，未能達到法案通過嘅最低門檻60票。美國聯邦可能最快會係10月1日凌晨起開始停擺，咁究竟停擺又會有乜影響呢？

 

　　如果美國政府一旦進入停擺狀態，基本上政府所提供嘅一切基本服務都停止服務，有部分核心部門仍需要繼續工作，但呢班人幾乎都係無糧出。當地媒體報道指，目前新冠疫情係美國肆虐，如果再出現停擺就會對醫護人員造成重大打擊，其中美國食品及藥品管理局需要保證有七成員工繼續返工，先可以維持藥品、疫苗供應，不過部門剩低嘅資金只夠維持五成七嘅員工薪金，剩低嘅一成三人就無糧出啦！

 

共和黨：解決債務上限係民主黨責任

 

（Shutterstock圖片）

 

　　由於美國政府缺乏資金，但為確保美國有足夠資金營運到本年12月3日，因此民主黨想暫停聯邦政府債務上限至2022年12月，等美國財政部可以係呢段時間發債籌錢。雖然眾議院係本月21日已經通過法案，但去到由共和黨控制嘅參議院就未能通過，參議院共和黨領袖麥康奈爾表示，共和黨贊成撥款等政府運作，但反對暫停債務上限，並指解決債務問題係民主黨嘅責任。

 

　　如果美國唔發新債咁又會點呢？美國財政部分派債息畀債仔嘅資金，最快就係10月18日耗盡，到時堪稱「全世界最安全債券」嘅美國國債就會出現史上第一次嘅至債務違約。由於美國歷史上從來未試過發生，經濟學家認為國債違約將會帶來金融災難、股市大跌等情況，繼而美國經濟就會下滑，利率急升等情況都會相繼出現。

 

耶倫警告：不解決債務上限將惹來災難性後果

 

（Shutterstock圖片）

 

　　作為美國財經界第一把交椅，耶倫立即向外界呼籲，同時警告議員應該避免美國聯邦債務違約，而財政部嘅資金將係下月18日將會耗盡，並表示如果國會不採取手段，財政部就會使用「特別手段」；並強調如果唔解決問題，將會帶來「災難性」後果，包括金融危機或者經濟衰退等情況。

 

　　美國債務上限其實係一條存在美國法律過百年歷史嘅法律，原意係想避免美國政府亂洗錢，不過自1960年開始，美國債務上限已經上調78次，平均每8個月就要上調一次。目前美國國債金額高達28萬億美元，外界相信如果真係發生違約，帶來嘅影響可能將會「史無前例」。

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票