修例風波愈演愈烈已經成為一個政治風暴，特首唔解決，結果咪警方疲於奔命，大家有眼見。Jenny近排都收到風前「二哥」劉業成會「翻兜」做警務處副處長，今日政府終於正式公布喇，委任仲即日生效添！一個咁罕有嘅任命，入面有咩盤算呢？

「特別職務」除咗搞國慶　仲有.......

　　今次劉Sir回巢，警方仲開個新位畀佢叫「臨時警務處副處長（特別職務）」，根據公布呢個職位係編制之外，主要職責係協助警務處處長處理大型公眾活動、策劃未來多項大型行動，包括國慶70周年相關嘅慶祝活動等。

　　講返小小背景資料先啦！劉Sir今年57歲，上年11月開始退休前休假，原本就今個月正式退休，今次任命應該只需延遲退休就得，快、靚、正！劉Sir處理大型公眾活動可謂非常有經驗！先後調任過警隊多個政策部及行動單位：2005年係港島總區高級警司嗰陣，處理過世貿韓農示威；2014年做咗行動處長，就指揮警隊處理佔領運動嘅人群秩序，佢亦都有份參與　2016　年旺角騷亂大部份決策。Jenny聽聞劉Sir作風都幾硬朗！

作風硬朗　熟手技工

　　有位熟悉警隊運作嘅Uncle就同Jenny講，就係因為劉Sir經驗豐富，所以佢今次回巢仲會主力幫手處理「反修例」示威嘅行動決策等嘅嘢，皆因而家「一哥」盧Sir、同未來「一哥」鄧Sir已經忙到一頭煙，加上對比劉Sir行動經驗亦較少，而家有熟手技工幫手，點都事半功倍，係咪先？咁內部各個「馬房」會唔會唔妥？Uncle就話Jenny諗太多，而家個環境仲輪到妥唔妥咩？

　　今次係回歸後警隊首次同時出現3個副處長，咁處理示威嗰陣，下面班細聽邊個話好？好多指揮官都畀唔到答案Jenny，只係話：「遲下至知！」Jenny就喺度諗，唔知今次劉Sir忽然回巢，會唔會最終上演埋一場「一哥」寶座爭奪戰呢？一定好睇過《寒戰》系列！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇