梁頌恒同游蕙禎單上訴官司都仲未審完，立法會行政管理會就已經率先化身成為追數小組，決定向兩人追討薪酬連同預支嘅津貼，全數各自$93萬，少個崩都唔得。

　　呢個消息喺立法會大樓入面都引起廣泛討論。普遍嘅聲音都認為，追討兩人10月份成分人工$95180，就算唔係由12號先開始計，都無可厚非，始終佢兩個「國民公敵」真係咎由自取。但係連開設辦事處已經使咗嘅津貼，包括購置寫字樓傢俬、電腦、影印機以至助理嘅10月人工等等，都一律認錢唔認貨；就算佢哋各自用晒80幾萬買嘢，都只能諗辦法變現還數，呢個做法就未免係咄咄逼人。

　　有建制派人士同Tina講，咁樣做都係逼不得已，主要依據係人大就《基本法》104條釋法內容列明，議員未宣誓唔可以享受任何酬金，所以由10月1日起追回款項。既然兩人無心去做議員，更加激起13億人嘅憤怒，自然就要去盡啲，做到「面對港獨毫不退讓」，都係同阿爺交差。

　　更重要一點，幕後要算得咁盡，目的係想佢哋再起多個「司法火頭」。就DQ議員資格已經使佢哋幾百萬律師費，依家打落水狗決定要佢哋還晒所有款項，就係要佢哋一係揀還全數，一係揀打官司，兩條都可以唔係生路，盡可能就係要一鋪打殘兩人，以免春風吹又生。

　　呢單料亦都引發其他後續問題，例如依家仍然排緊期、都好大機會被DQ嘅九西民選議員劉小麗。如果佢兩三個月後又被DQ，又被法官指佢10月12號未能宣誓之後已經喪失資格，咁又要追返幾耐人工同津貼？追返晒隨時要幾百萬，唔追又同梁游有所分別，咁點樣解釋自己「大細超」嘅決定呢？所以釋法從來都係有極大副作用嘅特效藥，食咗有咩影響，慘在連畀你食藥嘅醫生都解釋唔到…。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動