再一次印證一句說話，政治一日都嫌長。成個星期，整個政壇以至整個社會都聚焦於周浩鼎梁振英「打龍通」事件之上。件事發生始末，相信大家都清楚過「不懂撒嬌的女人」嘅劇情，Tina都唔再多講。

　　Tina同一位建制派議員傾過，佢就話一直以嚟，政府同建制派有緊密嘅溝通，呢個係人都知，但行政部門從來都唔會去到今次事件咁嘅層次，即係逐粒字改議員呈交嘅文件。佢仲話：「你話有啲委員會，政府想你問啲問題，等官員可以發揮下，呢個時有發生；甚至係畀埋條問題你都會有，但從來都唔會強迫你要接受，佢地只係表達想你幫手問問，你問唔問都係你自己嘅份內事。」所以今次事件，的確係超出咗同政府「合作」嘅底線。

　　建制主流聲音都好明顯，就係阿鼎的確係錯得離譜，所以事件發生後，各大建制政黨都無人出嚟「護鼎」。重炮手如何君堯，都只係想將視線轉移去梁繼昌是否適合做委員之上，從來無幫阿鼎開脫。據聞另一大建制政黨，仲通傳所有黨友唔好喺呢個議題上講任何說話，有咩就話由調查委員會自己解決。可想而知，阿鼎得唔到建制支持，退出委員會真係唯一嘅選擇。

　　無其他「盟友」支持唔緊要，自己黨友都應該撐呱？！先睇返阿鼎第一次出嚟見記者交代，全程只係得民建聯副主席陳克勤一個傍住，其他黨友失晒蹤。事件係阿鼎自己衰到貼地好難幫手係一個主因；但另一方面，原來阿鼎喺黨內都係「得罪人多」嘅一位成員。有民建聯人同Tina爆料，話阿鼎加入民記資歷非常淺，但地位就好似坐咗ICC電梯咁，一下子就上咗100樓；而阿鼎本身都係好聽就講句「年少氣盛」，唔好聽就「目中無人」，所以唔少區佬都對佢非常不滿，亦有黨內人樂見佢今次踩隻大蕉皮。

　　今日（19日）下午四時立法會UGL專責委員會會再次開會，暫時未知會唔會由閉門變返公開；但Tina相信，阿鼎退出委員會係唯一令件事降溫嘅做法，再撐落去真係成個建制派攬炒，唔好再死「鼎」喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇