噚日（23日）立法會又再一次流會。泛民毛孟靜噚日開會唔夠一個鐘點完人數之後無入返會議廳，最終在泛民得返一個鄺俊宇之下，總人數僅僅34人，爭一個先到法定人數，造就今個立法年度第二次流會。

　　流完會之後繼續「三步走」例牌菜。泛民高舉議會抗爭旗幟，建制大大力譴責泛民點完人又唔返嚟開會、濫用會議程序云云；最後就係大主席梁君彥用佢把低沉聲線再次講：「開會係每位議員嘅職責」，真係佢唔厭Tina都厭。

　　今次流會有一個特點，大家可能未必留意到，就係會議一開始點人之時，建制派都算係齊人嘅；但係一到「放風」時間9時45分，響完15分鐘竟然唔齊腳，的確係幾令人意外。據聞，有個別建制派人士喺噚日未開會之前已經收到訊息，可以的話，就算聽到鐘聲都唔好返去會議廳。當然，建制派一直嘅形象就係話泛民搞到流會，浪費社會資源；所以佢地都唔敢亂來，以免太多人唔喺度太過肉酸，所以都係個別建制派收到呢個訊息。

　　建制派「策劃」今次流會，目的好簡單，就係要將一啲排緊隊嘅附屬法例超過期限，咁啲法例自動生效咗，就唔使畀泛民喺立法會上提出審議，浪費時間；而最終效果就係要趕喺立法會補選之前，能夠上到修改會議規則嘅議案，封殺泛民嘅拉布技倆。

　　經歷上周建制派積極發言再加上今星期流會，唔少人都話，佢地能夠達成目的嘅機會相當高，不過今次最唔明嘅係，明明上星期建制已經打同一招，點解泛民又再次中計，令到拉布彈藥又少咗呢？建制幾位軍師都擔心，泛民中間會唔會有咩秘技未使出，依家都唔敢咁太高估成功修改議事規則嘅可能性。暫時每星期都會有新戰場，直到明年3月。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好