呢個星期，社會焦點轉咗一轉，由街頭血腥衝突，轉到去美國華盛頓政圈之外，同時間亦無啦啦轉咗去馬場。

　　周三（18日）嘅夜馬賽事，頭場有一匹名為「天祿」嘅馬匹，因為佢其中一位主人正正係反修例運動中揚名立萬嘅立法會議員何君堯，遭到示威者睇中，示威者喺連登揚言要入場支持「天祿」，最終馬未腳軟馬會先腳軟瞓低，周三中午宣布取消整日賽事，成為香港賽馬史以來一次極罕見嘅「人為」停賽事件。

　　Tina真係唔係講笑，用揚名立萬去形容何生絕不為過，佢嘅人氣真係席捲內地。叫內地人噏特區政府官員名，林鄭以外無人講到幾多個，但今次整場反修例活動之中，何生喺內地真係可以用「響朵」形容。Tina有一位住喺成都嘅朋友，都特登微信問我識唔識何生，話好想見佢真人，更有內地人用「民族英雄」去形容佢。稍為對內地民情有啲認識嘅都了解到，何生嘅立場，喺內地無論係普羅大眾或者係政府官員，都係非常受落，內地有「香港勝在有何君堯」呢個想法唔難理解。但其實站在示威者同反對派立場，亦應該同樣擁有「香港勝在有何君堯」嘅想法。

　　眾所周知，今次反修例活動之所以能夠發展到今時今日咁嘅規模，正正就係因為「零大台」嘅關係，示威嘅一方係無一個明顯嘅領軍人物出現。偏偏喺撐警方、撐政府嘅一邊，出了一個「大台」何君堯，呢個「大台」唔單止性格鮮明，搞嘅花款就更加日新月異，挑動兩邊對立情緒持續升溫。

　　要知道，任何領軍人物除咗可以聚集自己支持者嘅士氣之外，領軍人物一言一行同樣可以帶動敵對一方嘅士氣。而好明顯，何生嘅言行激發兩極情緒，支持佢嘅可以叫佢做「何特首」，唔鍾意佢嘅示威者更加將佢恨之入骨，但凡同佢有關係嘅人同物都係神憎鬼厭。何每次出來有新動作，都會再次推動示威者更團結、更加要同政府警察搞對抗，示威者又點會唔歡迎唔擁戴何生？

　　支持何嘅、反對何嘅，都希望何君堯繼續做好佢份工，但Tina相信，最想同何君堯講句「你條友出少句聲當幫吓忙得唔得？」應該會係林鄭。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。