仲有大約一個月時間，「新一屆」，唔係，應該係「新一年」嘅立法會就會開鑼。按照慣例，同一屆(每四年)嘅立法會，除咗大主席嘅位唔會郁動之外，所有委員會嘅正副主席，每一年都需要重新由委員會成員互選產生。對於2019至2020年立法年度嘅主席選舉，我相信各位讀者應該都歷歷在目。

　　咁多年以來，委員會互選主席本來就係「行禮如儀」。以前建制同泛民有偈傾嘅時候，每邊都會坐低講下邊個委員會由邊個議員做正副主席，一般都係一個建制一個泛民，之後就每年正副調位，務求大家都有得坐正。

　　但自從佔中之後建制泛民一路交惡，建制人多之下，大部分重要嘅委員會，基本上都已經無咗泛民坐上主席檯嘅歌仔唱。去年更加因為反修例事件引發一連串社會運動，泛民喺議會設立「戰綫」作出抗爭，同街頭抗爭配合，喺立法會最重要嘅一個委員會—內務委員會燒火頭，原主席民建聯李慧琼角逐連任內會主席，交由原副主席公民黨郭榮鏗主持選舉，結果郭把持選舉足足大半年，引發港澳辦和中聯辦罕有咁發聲明炮轟，最終大主席梁君彥要引用外間法律意見先將郭拉下主持選舉職務，最終李慧琼「順利」當選。

　　建制好早已經賽後檢討，當日就係無諗過泛民玩得咁盡興，無搵多個建制後備選主席，令到李慧琼獲提名之後，硬要由郭榮鏗主持選舉。雖然最後內會正副主席都係建制派擔任，分別係李同埋馬逢國，嚟緊再選應該唔會有任何差池，但係多個事務委員會仍然有泛民做副主席嘅影蹤，「郭式主持」仍然有可能再次發生。

　　據聞建制派大黨多位首腦已經碰頭商討，如果泛民全體留任之下，點樣避免有關情況再次發生，因為首次畀人突襲成功都勉強可以話責不在我，但如果再次發生，建制派都真係難以向西環交待。建制派首腦商討過後，已經列出高危委員會名單，更加建議所有上年做緊主席嘅，為大局今年全部唔好冧庄，由其他建制議員頂上，咁樣「原主席」就可以負責選舉，以免重蹈覆轍。但由於建制首腦預期有個別「主席」都幾戀棧主席一職，所以呢個初步方案都仲未得到全體建制派嘅共識，如果真係有「主席」唔聽勸，最終可能要由更高層次嘅領袖介入。目的都係得一個：「大局為重」！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情