近幾日可以話係一「石」激起千重浪，呢舊石就係現任立法會地產界代表、議員資歷最深嘅石禮謙所牽動。佢喺接受報章專訪時除咗點評歷任咁多任特首功過之外，講到工聯會狠批地產商囤地指控時更話人地係「政棍」，「希望新的立法會趕走政棍」。結果呢篇訪問就令到工聯會高層個個面紅耳赤，曾經向林鄭「一罵成名」嘅麥美娟更加直接向石禮謙開火。

立法會地產界代表石禮謙。（資料圖片）

　　兩個尊貴嘅建制派議員互相開火發炮，大家可以搵返相關報道睇下來龍去脈，Tina想睇嘅，反而係未來一段長時間議會極可能缺乏泛民呢個共同敵人之下，建制派所開展嘅利益爭奪戰，最終會有幾激烈。

　　今次石麥之爭，其實係有(極多)產階級同無(咁多)產階級之間一直以來都存在嘅矛盾，但睇深一層，工聯會挑起「鬥地主」呢條戰線，其實都係緊跟阿爺近年嘅路線。近嘅科技巨企個個都被阿爺以反壟斷為由進行整肅，地產企業更早早已經落入阿爺眼內，近年對地主嘅行政措施更加係十隻手指都數唔晒，當好多行業股份月月創新高，內房股股價都係浮浮沉沉，同國家嘅經濟發展情況背馳得非常緊要。

　　以往建制派有共同敵人，阿爺為求槍口統一向外，縱使工聯會有幾不滿地產霸權，佢地都唔會開口埋口針對地產界；但今時今日無咗泛民，工聯會率先挑起呢張對抗「土豪」呢把槍，估計地產界都開始深感不妙，可能觸動到地產界多年來嘅利益關係，石禮謙先代業界出聲，甚至用到政棍呢一個只會用來罵泛民嘅貶義詞。

　　Tina打聽過，喺完善選舉制度制訂之後，阿爺嘅部署似係要減低商界、最主要係地產界對特區政府嘅影響力，甚至有商界曾經透過傳話人對此表達過不滿。但係唔少人都向阿爺表達過，高房價係令到香港不穩嘅其中一個主要因素，阿爺為咗一次過解決香港深層次問題，必然會要求下任特首喺政治上無後顧之憂嘅情況下，進一步解決呢個矛盾。

　　嚟緊議會90席，代表傳統地產商利益嘅估計將會被大大溝淡，下一屆政府預料都會有一連串嘅動作去解決長久以來「地」所帶來嘅社會問題。至於石禮謙口中所講嘅「希望新立法會趕走政棍」，Tina深信，只要係阿爺決心去解決香港嘅問題，走咗一個「政棍」，第二個入局嘅一樣都會係「政棍」。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇