政壇呢個星期新聞，圍繞住打麻雀術語「清一色」。先有愛國重量級元老盧文端打響頭炮，撰文指民主黨若果全面禁止成員參選將會死路一條；其後林鄭見記者時講返同一議題時亦都附和，話一個政黨不議政、不論政、不參政，就要質疑其存在價值，似乎都係有啲逼迫嘅語氣斥民主黨唔打算派員參選。正當大家覺得建制派都唔希望政壇「清一色」、應該會對泛民開一條生路嘅時候，噚日身兼資審委主席嘅政務司司長李家超就公布，鄭松泰過唔到資審委嗰關去做當然選委，仲即時DQ埋佢嘅立法會議席。「清一色」之說，再次浮起。

（資料圖片）

　　鄭松泰被DQ的確幾令政壇吃驚，事關鄭雖然被標簽為「泛民」，但佢喺立法會嘅議事行徑都同泛民格格不入，包括唔會瘋狂拉布、唔會亂點人數、唔會點完人又離席等等令建制派恨之入骨嘅惡行，甚至佢無跟泛民總辭而獲得兩辦公開讚揚。所以今次被DQ，唔少建制派私底下都認為，鄭過去部分對基本法論述可能係死因之一，但觀乎過去一兩年行為，資審委對於鄭松泰真係嚴到過咗頭。

　　一位較開明嘅建制派同Tina講，的而且確，DQ鄭松泰有啲令建制派主流意見跌眼鏡，對於「非清一色」論亦帶來幾負面嘅影響，「無可否認嘅係，現時政治氣氛之下，泛民嘅議政空間已經愈來愈細；班有心想選、又從未有過港獨主張嘅泛民人士，見到鄭被DQ，自然擔心自己過去一啲言行同埋泛民背景會唔會令到佢地一樣被DQ，減低佢地爭取出選從政嘅意慾，但我都相信，阿爺係唔想香港政治圈係清一色。

　　但睇到鄭今次被DQ，大家會諗，唔係「清一色」的話，咁「混一色」又點樣混法？呢位建制派就話，如果以現時嘅力度，最大可能就係要所有泛民政黨大清洗，總之過去有過任何些微涉及港獨言論同行徑嘅人，都無可能出選到，只有一批「新血」，明確表明自己身在泛民、代表泛民，但堅決支持愛國愛黨愛港，理性反對政府提出嘅民生政策，絕對唔會係死罪。

　　Tina不禁問佢：「咁同換張白紙入去無乜分別喎？」建制回應：「唔係白紙，係白板，夠晒乾淨，十二隻萬子加兩隻白板做眼，咪混一色囉！兩隻夠架喇，唔好多！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票