立法會席席有競爭？

　　距離立法會選舉報名日只係得返兩日，理應已經進行得如火如荼嘅選舉，外面似乎仍然係水盡鵝飛，真係靜得有啲恐怖。不過通常出面愈靜，實際上內部就更加風起雲湧，據聞爭崩頭情況係無一刻停止過。

　　今日(28日)又有消息傳出，話阿爺已經拍板，希望每個位都要有競爭，去體現「完善選舉制度」係有幾咁完善…咁講明係選舉，既然係完善咗，就一定係要有得選先至係完美。平時大家見到嘅直選，當然係爭到你死我活，從來無出現過自動當選，但係唔少功能組別，「山寨王」文化好強烈，幾乎年年唔使選，好似鄉議局、保險界、工業界呢啲，現任嘅議員印象都真係未經歷過選舉洗禮，要呢班「山寨王」都要落地去選，的確係幾新穎嘅諗法。

(資料圖片)

　　Tina向個別建制派打聽，大家都對呢個講法有啲突然。「唔係話你要有競爭就真係會有競爭，總有啲界別係唔會有人出來選，好似鄉議局咁，主席劉業強就一定係選，咁邊個鄉議局嘅人想出選去撼主席？你夾硬搵個人出來同佢選，亦都未必好睇，萬一真係令到主席選唔到，咁邊個負責？銀行界就更加，大家都係金錢掛帥，邊有人願意拋個身出來爭？協調到個人出來代表業界已經算係咁！」一位建制派指出呢個講法嘅矛盾位，而佢亦相信，阿爺同西環應該係樂見大家都係愛國的話，大家就公平競爭，但亦唔介意某啲界別係「眾望所歸」。

　　另一名建制派就話，據佢所知，選舉委員會嗰新增40席就似乎真係爭崩頭，現時計計下隨時入閘單位超過60人，即係1.5個人爭一席。至於其他功能組別，過去一直都無乜人願意出來爭嘅，都一樣係未聽聞會有競爭，「真係專登做到有競爭的話，個抬橋嘅候選人無質素當然係肉酸；如果係有返咁上下質素，真係畀佢入到閘，唔通佢自己真係唔想選到做議員咩？咁樣其實好難控制，未必係阿爺樂意見到嘅結果。」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票