【行運中】愛在瘟疫漫延時：網購在家，天降桃花？

　　一向臉容素淨的她，雙眸在眼罩上漾著流動的波光，肯定有故事！

 

　　「咦！眼有艷光喎，有艷遇？」我問。

 

　　其實都不必問。眼光灩瀲，水靈靈的、光閃閃的，在相學上，明顯有桃花；在生理上，她就是會行走的戀愛賀爾蒙。

 

　　原來花粉傳播的渠道很出人意料。

 

　　Home Office的日子，她悶到發慌，於是投入二手網購，發現一有趣Post：

 

　　「我有一百條廁紙，屋小紙多，現在家不成家，大家幫幫手啦！」

 

　　她覺得這人挺可憐的，就打電話去，男士接聽。

 

　　「請問賣幾多錢一條呀？」她問。

 

　　「我六十蚊成本，你出幾多吖？」

 

　　「你梗係早前一排買咧，咁貴。而家35蚊咋喎！」

 

　　「係咪？重要戰略物資喎。」

 

　　「你真係不食人間煙火，咁你當時點搵到一百條架？」

 

　　「我係核數師，每年年初都忙到死。有時間都去Gym啦。係我阿媽發揮佢嘅師奶動員網絡撲番嚟嘅，反而我喺網上訂口罩，畀人呃咗幾千蚊，真係E悲！」

 

　　「唉！我上網都上當呀，真係同病相憐。係呢，一百條點放呀？你屋企有幾大？」

 

　　「七百二十一呎。三個人，連埋媽媽賓賓、仲有二犬三貓一鸚鵡。本來已迫，而家我返屋企，同廁紙零距離，佢真係無所不在，煩死咧。」

 

　　「咁你平啲賣啦，話哂都係二手貨，我嫁第一次擺三十圍，如果嫁到第二次，三圍都冇啦！」

 

　　「你嘅推論，雖然欠邏輯，或者不適用於呢個Context，不過都幾搞笑，好啦！我賣三十蚊一條啦，不過你上嚟我屋企攞貨噃。」

 

　　於是二手購物平台變了二手相親平台，因為當日他們不只過了數，還過了電。

 

　　不知算不算善有善報，她發了那丁點善心，想把他從廁卷紙海中拯救出來，卻藉著這通電話，搞通了他的婚姻狀況、專業類別、社會功能、家庭成員、房屋大小、寵物數目、業餘嗜好……等等。

 

　　所以呢，行起運來，就是呆在家中、悶中、發霉中，也會姻緣速遞、天散桃花，說不定還會立室成家！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇