【升職加薪】嬴人先要了解自己！不要成為「Underpaid」打工仔

　　每個打工仔都會好好奇「自己值嘅錢」、「喺市場上係咪underpaid」。除咗市場平均薪金（市價）之外，其實仲有好多方法去評估自己嘅價值。作為一位marketer，要贏人，一定要先market自己，嘗試當自己係一隻股票，而買入呢隻股票嘅人就係公司老細。

 

　　如果你懂得market自己嘅價值，將自己變成一隻潛力股的話，眾多老細必定向你招手，而你嘅「股價」自然上升。買賣股票計增長率、槓桿等等，同樣打工仔亦都有自己嘅一套計算方法。

 

槓桿比率

 

　　槓桿唔一定係買賣股票／樓先會用到，其實有部份公司去決定員工薪金或加薪時，都會以呢個理論作基礎。

 

　　不同行業都會有自己一套槓桿比率，意思當公司係支付人工時，該員工可以幫公司賺幾多錢。例如員工薪金2萬，槓桿比率係3，該員工嘅KPI 就係要每月為公司帶來6萬生意，亦即係呢個員工能夠搵6萬生意，先有資格有2萬蚊人工。再從另一角度睇，如果一個部門每月總人工係15萬，而槓桿比率係1.5（平手）／ 2.3（小賺）／ 5（到數）的話，咁呢個部門每月就要搵17.5萬／34.5萬／75萬生意。可能你會問，點解1.5先叫做平手，因為除咗燈油火蠟之外，有啲部門係冇直接嘅生產力，例如老細、IT support、HR等等，佢哋多數時間嘅工作係支援多個部門，比較難獨立賺錢，所以有生產力嘅員工需要「出糧」俾佢哋。

 

　　當然，每個行業、每間公司都有不同做法，做sales或者某啲行業嘅大公司，要做到 8－10 先叫「到數」，所以以上只作參考，但所有老細心中必定有呢個數字。如果你能夠每月為公司帶來比你人工數倍嘅利潤的話，就代表你非常有價值，加人工嘅機會亦會大增。

 

增長率

 

　　升職升得快、人工加得多，除咗係際遇之外，亦係實力嘅表現。際遇同能力中等嘅打工仔，多數每年人工加幅5-15%，約2-3 年升職一次，而每次升職加人工15-20%，轉工時嘅平均加薪幅度同升職相約，而人工越高，加幅會相對地慢慢減少，呢個就係打工仔嘅增長率。以上嘅增長率除咗係比自己嘅指標之外，亦係面試官同老細嘅指標。例如你5－6年都冇升職，但人工仍然係每年只加5－10%，甚至乎冇加，就反映出你個人比較傾向穏定，能夠接受較低嘅加幅，見工時你嘅議價能力相對地低。又例如每次跳槽你嘅人工都有30-40%加幅，多年來升職比人快，老細們覺得你underpaid同時唔介意「高追」，證明你能力較高，係一隻潛力股。

 

　　同炒股一樣，除咗有「基本分析」，亦有「技術分析」、「大圍氣氛」等等，都影響你嘅價值。而重點係，打工仔必定要對自己有個基本了解，知道自己嘅位置，先能夠談「議價」同「增值」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票