【辦公時間】工時愈長代表愈勤力？成為職場有料之人，並非取決於工時！

　　你通常幾點放工？做晒嘢就走？定等阿姐走咗你先敢放工？

 

　　身邊一位朋友剛剛轉工，返新工兩星期，我問佢工作環境如何。

 

　　「黐線，我阿姐同我條 team 全部都早過我返，遲過我走！」朋友答。

 

　　「咁佢哋返幾點，放幾點？」我問。

 

　　「就係唔知！我都已經返九點三，放六點半，但都無見過佢哋放工同返工。佢哋好似喺office紮營咁樣。」朋友一臉無奈。

 

　　初踏入職場，我有一段時間都好在意返工同放工嘅時間，更為自己設下一啲無形規則，例如唔可以早過上司離開公司，或者唔可以同其他同事嘅放工時間相差太遠。我諗嗰個階段嘅我只想為自己喺其他人心目中留下一個勤力嘅「好印象」，亦顯得同其他同事更「合群」。

 

　　有幾多個晚上，明明自己已經冇 urgent 嘢喺手，inbox 又冇未讀郵件，但就因為想保持勤力形象而留守至晚飯時間？

 

　　當你慢慢累積工作閱歷，試過喺幾間公司工作過，認識過更多同事上司，你就會意會到工時長，其實並不代表甚麼。

 

　　喺公司真正有料、備受看重嘅人，係喺開會遇到難題時，你會望住佢嘅嗰一個，佢亦係你同其他 team 有拗撬時，你會cc畀佢，然後問佢「what do you think on next steps」嘅嗰一個。至於佢幾點放工？Who cares? 甚至乎你知道佢每日準時五點半就會去fitness做gym，你約開會時都會特登就佢schedule。

 

　　我明白每間公司都有自己嘅工時文化，每個上司都有自己評估下屬嘅標準，但為自己設定職場目標，就請以以上別人覺得自己有料的指標進發，而非工時。

 

　　到了達標的時候，你可能依然會著緊自己的工時，因為你很在意因為 OT 而減少自己共聚天倫、真正生活的時間。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

•