【疫下轉型】從味道、環境、服務入手，餐廳三管齊下應對外賣潮流！

　　顧客多數以味道、環境、服務去評價一間餐廳，以上三件事環環緊扣；但疫情下，多咗人選擇叫外賣而唔去實體店，呢三件事嘅關係性慢慢被改變。因為多數顧客都以第三方外賣平台叫餐，所以餐廳亦可以話冇無乜「環境」、「服務」可言。要應對外賣潮流帶來嘅轉變，就要跟據呢三點作不同解決方案同轉型。

　　因為外賣平台大行其道，所以大多顧客好少會直接聯絡餐廳叫餐，即係話，大部分外賣生意都唔能夠同顧客有直接接觸，如是者會出現兩個問題。一，餐廳唔能夠真係將自己好嘅服務直接帶畀顧客；二，餐廳唔能夠控制外賣平台／外賣專員嘅服務質素，當兩者加起來時，就會間接影響餐廳生意。例如外賣專員遲到、運送期間倒瀉食物而令味道有所改變等，最後顧客因而唔再選擇該餐廳。

　　如要繼續使用外賣平台，就代表要轉攻售後服務。餐廳應該要多了解外賣顧客所面對嘅問題，從而爭取有下一次回頭客嘅機會。餐廳可以多做售後問卷，除咗了解問題加以改善，同埋做巿場調查之外，仲可向受外賣平台送餐影響嘅顧客送現金券，一來可以彌補外賣平台服務嘅不足，二來現金券能夠吸引回頭客，甚至能夠帶動人流去實體店進餐，親身感受自己優質服務，一舉兩得。

　　「環境」對顧客嚟講係一個體驗，餐廳內嘅設計、音樂、燈光、傢俬等，都係五官體驗，但因為顧客屋企係改變唔到嘅因素，加上環保理由，顧客選擇唔要餐具，所以剩下唯一可以改變嘅因素就係餐盒。其實有部分餐廳已經開始為餐盒轉型，重新設計餐盒，喺外觀上令不同食物放於同一餐盒內更有特色、更有美感，有啲更將盒同蓋多加一重隔熱同防溜物料，令食物保存更好更耐，觀感上會令人覺得更「pro」。雖然以上做法會加重成本，但如果能夠喺疫情下賺到回頭客同口碑，所有嘢都係值得。

　　「味道」係一個較難控制嘅變數，經過外賣過程後，能夠仲保持原有味道已經唔係易事，如要再為味道「增值」，可為難上加難。所以要關注嘅地方除咗「質」，亦不能忽視「量」。因為外賣盒有所局限，好多菜式未必能以外賣方式送出，所以首先要將所有產品「外賣化」，尤其係重點產品。另一方面，疫情下現有菜式要有所改變，要加上專為外賣而設嘅食物／飲品，先會更為賺錢。例如早前有餐廳再推「外賣五公升裝珍珠奶茶」，反應非常熱烈，可見新常態菜式亦係值得投資嘅地方之一。

　　唔單只餐廳，不同行業經營手法已經完全唔一樣。喺新常態環境下，實體店存在意義已經完全被改變，公司要再一次定義online／offline生意嘅定位，同時亦要互相連動，先係新常態下嘅新企業。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇