【聽覺營銷】研究指音樂可提升營業額兩成！如何制定「音樂策略」？

　　好多無形環境嘅轉變，其實對消費者購物模式有著十分大嘅關聯性。調查發現，天氣好嘅時候，會較多人願意洗錢，反之天氣差時，減少出外消費之餘，消費金額亦會較少，購物時明顯「手緊」。另外，多數客人喺平日嘅消費時間較短，周末則較長，係因為多數人潛意識覺得明日要返工，心情必然會帶點緊張同顧慮，購物欲相對地減少。其實好多時消費者可能本身已經有購買嘅意欲，不過一啲外間無形嘅轉變，能夠好容易左右佢哋最後決策，情緒被帶動下因而增加／減少消費。當然我哋冇可能控制天氣，但消費場景產生嘅五官感受，就有可能控制得到，其中一樣最少人注意到嘅就係聲音。

　　對比視覺，聽覺可以話係更有效嘅宣傳工具，因為就算你店內嘅宣傳品有幾多幾勁都好，客人一轉身就會睇唔到，但聲音就唔可以，當你進入到一間商店，店內播放嘅音樂可以話係避無可避，往往好多人會忽略咗將音樂用於營銷之中。好多年前有外國商店老闆做咗一個對比測試，喺同一個場景下，發現有播音樂嘅生意額比冇音樂時高出20%。後來更發現，原來輕快嘅音樂／歌曲，會有「趕客」效果，而節奏較慢嘅音樂／歌曲，則令客人逗留時更長。但有一樣嘢值得留意係，其實不同類型商店都有自己不同嘅「音樂策略」，例如快餐店播放快歌希望加快翻枱嘅速度，又或者喺運動店播快歌可能會帶動客人情緒，更願意消費。

　　除快慢之外，原來音樂亦有地域性、環境之分。近年有另一項研究發現，如果喺一間商店內播放地區性嘅音樂（例如英式音樂／歌曲），會令客人有置身當地嘅感覺，間接影響消費者購買該地區出產嘅產品。同樣道理，喺傳統西餐廳內播放傳統優雅嘅音樂，能夠令客人覺得自己置身高級環境之中，因為唔想失禮而更願意洗錢。當然首要條件係，客人要對音樂嘅認知度高，而播放嘅音樂亦要較為人熟悉，聽其音樂知其地區／歌星，相信先能達到以上效果。最後有一項較為特別嘅研究結果指，原來純音樂對年青消費者嘅購物慾影響較大，而有歌手唱嘅歌曲則對年長消費者影響較有效，估計可能因為年長客人記憶力較差，需要以歌詞／文字去增強對歌曲嘅回憶，而年青人相對地對不同音樂類型嘅接受程度較高，節奏同旋律已經足夠勾起潛意識嘅回憶。

　　現今嘅營銷手法，已經唔單只係以直接嘅工具去影響消費者決定，反而會經常以不同方式喺消費者嘅潛意識上「種草」，種植一個長遠訊息嘅同時，亦希望加深你嘅記憶，而音樂，就係最好不過嘅手法。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票