【疫下新常態】疫下哪些生活日常悄悄改變？2021市場將繼續洗牌！

　　疫情已持續一年，相信好多人已經習慣每日戴口罩、口罩套、搓手液出街，攞定張紙巾㩒「車立」，喺街上唔會亂掂嘢，就算掂完都會立即搓手。以上種種已經成為你同我嘅日常。除咗以上個人習慣，其實仲有好多以前習以為常嘅事物已經靜悄悄地轉變。

　　舊時喺街上總會見到好多人邊行邊食嘢飲嘢，趕住返工喺巴士火車上食早餐，或者下午茶喺街篤兩串魚蛋，但近一年罩不離口，以上情況已較少出現。間唔中見到有人喺街拉低口罩飲食，作為旁觀者戥佢擔心之餘，亦會自覺地敬而遠之。香港各區總有一間喺你附近嘅珍珠奶茶店、小食店就首當其衝。除咗大集團式營運嘅品牌，較細型嘅飲品小食店好多都已經關門大吉。

　　另一樣靜悄悄地轉變角色嘅物品就係大家嘅行李箱。前幾日收到一封宣傳電郵，係某一國際行李箱品牌做推廣，「買兩件六折，三件五折」。以往呢個中高檔行李箱品牌嘅減價幅度大多唔會超過 20%，但喺全世界都「冇得飛」嘅情況下，行李箱需求之低大家可想而知。

　　另一個同「冇得飛」相關嘅產物就係飛行里數。以前好多公司品牌做宣傳，或者任何會員制嘅迎新禮物都好鍾意用飛行里數作招徠，因為佢喺市場上的確有一定需求，總有一班人會為咗賺取幾百個 miles 而開一張新嘅信用卡或額外消費，所以飛行里數曾經係好多marketer 嘅吸客法寶。只要肯洗錢買 miles 就一定有相對回報。但疫情將去旅行嘅心情同憧憬都徹底幻滅，再用飛行里數嚟幫 campaign 跑數亦已經變得無效。

　　以上只係疫情下改變市場常態嘅一小部分例子，其他例子仲有電視台拍唔到旅遊節目、訂酒店機票嘅平台倒閉、街上靠人流支撐嘅戶外廣告冇品牌願意洗錢等等。市場喺 2021年將繼續洗牌，觀察多啲、唔好害怕轉變將有助大家喺新常態下生存。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。