【營銷攻略】「無酒精啤酒」巿場每年升7%！如何利用酒精飲品痛點變成推廣策略？

　　娛樂事業相關嘅生意，喺每個年代都變得好快。八、九十年代興Disco同Bar，二千年後冇人再提Disco，取而代之變成Club同Pub。到近年因交友app盛行，去Club同Pub嘅人又少咗，加上近年疫情嘅影響，除咗娛樂事業大受打擊之外，亦影響緊酒精飲品行業。當年Disco／Bar 嘅客群大多都係酒精飲品愛好者，但時至今日，酒精飲品嘅熱潮開始有少少放緩，加上無酒精啤酒飲品進軍巿場，漸漸取代傳統酒精飲品，成為新一代年青人嘅選擇。

　　早前有巿場調查指，近六成年青受訪者稱將來希望減少購買酒精飲品。原因可能同近年不同環境因素影響有關，例如多咗人注意酒精對健康帶來嘅不同影響、不同國家法例嘅監管、銷售平台 / 廣告平台對酒精飲品銷售及宣傳嘅限制等，對生意及消費者體驗有一定影響。雖然數字顯示酒精飲品巿場仍以每年約3%上升，但以上嘅問題與日俱增，相信業界面對嘅挑戰只會有增無減。另一方面，無酒精啤酒飲品巿場更以每年約7%不斷上升，估計去到2026年，market size更會高達約350億美元，係2016年嘅1.6倍左右，升幅驚人。

　　其實早年已經有飲品公司加入戰線，但當年無酒精啤酒飲品並未大受關注，所以銷售成績一般。不過近年因酒精飲品負面因素影響，喺此消彼長的情況下，造就咗無酒精啤酒飲品有突破嘅空間。例如喜力早前於不同國家逐步推出無酒精成分啤酒，成績非常彪炳。報導指喜力該產品於去年成為全美無酒精酒類銷量之冠，更於不同國家錄得雙位數字增長，為集團帶來約5,400萬美元銷售。其成功除咗配合360噱頭宣傳攻勢之外，亦因為佢哋十分明白酒精飲品嘅痛點，利用過去嘅痛點變成推廣策略嘅優勢，係十分成功嘅一著。除此之外，今次無酒精啤酒飲品嘅成功，亦同時間提升自己整體品牌形象，間接對酒精飲品生意帶來某程度上嘅正面幫助。

Read More：梗有一間喺左近！茶飲市場表面「長青」實質萎縮？想突圍要捉緊「朝代變遷」？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票