近日招標搞到地產界滿成風雨，政府最後都要出招管制，我唔知道政府是有心抑或無意，在復活節賣樓黃金檔期才出手，將地產商的賣樓步伐打斷，復活節都唔知道用唔用招標賣樓，一般人可能唔知道，復活節其實是小陽春尾聲，如果復活節唔賣樓，5月6月被稱為五窮六絕，鬼佬都會話「Sell in May and walk away」，除非大幅降價，否則銷售情況不會太理想。

　　有老友問，我講，政府並不是有心整蠱地產商，為了監管新樓銷售，已經成立了一個新樓銷售監管局，專人監察地產商在推銷新樓時有沒有違規，可惜用人不當，銷監局專員是從食環署調過來，以管理小販手法來管地產商，根本九唔搭八。所以，就算政府內部認為今次是銷監局失職，但我不會同意，我認為是負責政府人事任命的部門失職，搵管理小販的人管地產商，能夠造好成績都冇人信。

　　如果大家認為招標是賣新樓的最好方法，其實是錯到不得了，因為每一次招標所得到的價，都是反映是最高價，如果樓市沒有變化，招標價只會愈來愈低，所以地產商唔想公開真實樓價，甚至會愈賣愈貴，不過回贈就會愈來愈多。誰不知政府棒打鴛鴦，我相信如果地產商公開過去幾個月招標賣樓的折實價之後，就會發覺樓價太過參差，樓下隨時會貴過樓上20%，一定會出現很多訴訟，我都唔知道點樣收科。其實，在地產界這並不是甚麼秘密，不過一般評論員都唔會講，就算自認講真心話的評論員都唔會講出真相。

　　今次除了買新樓的人是受害者之外，不少買二手樓的人，亦因為睇到每一次新樓盤招標出售，售價愈來愈高而買樓，他們可能是最大受害者，因此他們不可能要求地產商賠償亦不可能取消交易，如果他們睇清楚新樓價，可能比所買了的二手樓低了一截，想唔暈都唔得。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇