有老友話最近有部分樓宇樓價跌了超過10%，而林鄭又推出新按保計劃，問現在是否應該買樓？老實說，買樓這件大事，的確是因人而異，最保險而又最冇意思答案，當然是有需要而又負擔得起便可以買樓，我老友當然不會滿意這個答案，於是再問現在應該買樓抑或買股？

　　現在買樓抑或買股主要是睇閣下手上有幾多銀両，如果冇乜錢，要借足九成，當然是買樓，林鄭大開綠燈畀上車的人，唔買就笨！不過，用九成按保買樓的人防守力是不足夠，如果有乜風吹草動，他們隨時可以放棄10%訂金，在防守力不足的情況下，可以借八九成的樓價有機會急跌，但冇錢就冇辦法，一定要買樓，否則揸住10%樓價去買股票，賺極都有個譜。

　　如果有錢當然唔會買樓，與一班防守力不足的人一起買樓，當樓價下跌，自己能夠防守都冇用，一定會畀那一班防守力不足的業主拖累，而且現在買樓的回報很低，不如買股票，回報率6%的藍籌股比比皆是，收股息好過收租，而且又不用付那些辣招印花稅，現在時局唔好，更加可以隨時賣股套現走人。不過有人認為樓市長線必升，雖然回報低一些，但長遠樓價升幅遠比股票優勝，這個理據在以往的確成立，但林鄭的《施政報告》確認大幅增加供應，1000萬以下的樓價升幅將會受到阻礙，不過，大跌又不會。香港股市雖然受到中美貿易戰與社運影響，但表現仍然持續穩定，如果這兩件事獲得解決，股市上升的空間很大，老友聽完我講之後，叫我利申，我話最近的確有買股票，而且在一個月內升了15%，不過是那一隻股票就唔講得，講左不但很煩，而且可能會觸犯守則，總之一句，現在冇錢買樓，有錢買股。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。