做個完美退休老公

　　男人啤一啤吹水，只要不講政治，不講公事，不涉權力，是可以很快樂的。

 

純男人聚餐，快樂無比，講乜都得，包括呻老婆好煩

 

　　昨晚，幾條退休大漢到酒吧紅白威啤酒齊灌。呢啲場合，最好齊呻老婆大人幾鬼煩。呻完，個個舒服晒，回家「繼續煩」，這就是人生。

 

　　「肥佬李」今晚做主角，將冰凍白酒一飲而盡，揸住張過膠卡仔講：「各位兄弟，昨晚替老婆大人做生日。之前，問佢想要乜禮物。點知，佢微微笑隊個信封過嚟，打開就係呢張咭仔！」

 

忘記老婆生日是死罪，一定要預早訂旦糕

 

　　老婆大人要求的生日禮物，正是：「未來一年，我要你全部做足，最少達到九成！」

 

　　「嗱，兄弟，我私人醒你地，一人有一個COPY！」老李在另一個信封攞出成疊過膠卡：「嗱，一人一張。做得到，保證你快活過神仙！做唔到，保證你煩惱到命都冇！」

 

　　究竟係乜呢？正是「好老公計分法」。內有廿項，係人老公者，可能讀每一項個心就震一震。包括：一、擁有一手好廚藝；二、年年記得老婆生日日子；三、完全理解並掌握老婆大人的喜惡；四、平日主動分擔家務，洗碗掃地抹窗；五、不准亂發脾氣及情緒化、六、懂得理財，早日達至全家財務自由；七、願意傾聽及適時安慰太太；八、永遠將太太放第一位；九、接受老婆鬧我是為我好的大道理； 十、男人大丈夫，有正義感而不怕事；十一、讚美老婆，句句由衷，兼且，絕不吝嗇常常開口講；十二、吵架後，有理冇理，老公都先要認錯；十三、逢過馬路，要拖實老婆；十四、不時會突然送窩心禮物畀老婆；十五、老婆情緒陷低谷時，要不停鼓勵及打氣；十六、視外父外母如自己親生父母，孝順及愛護；十七、吃飯時為太太夾喜歡食的餸菜，不准不知是哪樣；十八、太太shopping完畢，老公負責找數及挽住晒佢；十九、任何時候都用即興傳給太太窩心短訊；二十、大風及寒冷時，第一時間脫下外衣給太太蓋上保暖！

 

好老公廿誡長放袋中，有空就唸

 

　　在座個個「人哋老公」一路睇一路皺眉。互問：「喂，老友，呢個世界，有冇如此完美的老公㗎？就算有，咁，佢又冇權要求一個完美的老婆呢又？此外，呢廿項，大家只在電影中見到呃靚女入陷阱的姑爺仔才會做齊。女性遇到呢類『不是正常老公的老公』，快點掉頭走啦！Too Good To be True 喎。」

 

記住，勿與老婆講道理，只講愛與包容

 

　　小弟又點睇？騎騎騎，幾大唔好表達真正意見，否則……總之，一入家門，只講愛唔好講道理。重有，老婆大晒，佢嘅意見就係為夫最後的意見！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

•