薪高糧準vs痛苦難當

　　退休之後，經常在不同社交場合遇上各式人等，或開玩笑，或認真帶妒忌語氣嘲諷：「碌sir，你就好啦，印印腳食長糧，呢世無憂！」

　

　　本來，最理性的標準答案為：一、所謂長糧，其實是工作時每月扣起部份薪金以作延後發放。今天的公務員，沒長俸，因月月先收齊全數。長糧絕非福利！二、打政府工，不似外間，有機會短時間飛黃騰達，有花紅、雙糧、股份分派。做生意，更有機會發達。經濟好時，公務員絕不會享受到任何「紅利」！你睇我好我睇你好咁啦，冇乜值得羨慕！

 

公務員工作安穩，但呆滯刻板，永遠不可望發達。

今時今日做公務員，尤其退休能享長俸的，必須感恩。

 

　　以上兩點講道理的答案，我有冇試過宣諸於口呢？一次都冇！次次皆只雙手合十：「感恩感恩，感謝各位納稅人的善待！」

　

　　今日諗起此話題，因為，愈來愈覺得今天的大群頂級官員，表現上，已冇咗以前政府對公務員的要求——做個公僕（Civil Servant）。用中國講法，就是——為人民服務。

 

「公僕」這概念，香港官場已經日益淡出，惟新加坡政府仍非常強調。

　

　　事實，一字排開的政府高官，全部幾百萬年薪，絕對薪高糧準。兼且，有官邸或房屋津貼，有司機，有秘書，有寬敞辦公室，有豐厚福利。最重要，完全無懼失業。在這「鐵的一般」生活保障下，久而久之，就會失卻對民生、民意、民情的掌握，因為完全感受不到市民大眾所感受的。漸漸，進一步忘記了做父母官最重要的同理心。

 

特區高官，位位年薪數百萬，司機、秘書、官邸或房津有齊。久而久之，自然「離地」，不解民間疾苦。

 

　　過去一年，市民感受到水深火熱的煎熬，當然會發出哀鳴或埋怨甚至謾罵發洩。此時，高官應該如何面對？內心，可以百分百理性及「科學化」，但眼神及身體語言，則必須流露出「我與你站在一起」的感性。對不幸者，應加以安慰。大忌是，露出高高在上凌厲眼神，甚或作出冷笑，報以一個——你哋知乜吖？的表情。

　

　　小弟有感而發，因近日百業重創，所有做生意的朋友，皆叫苦連天，簡直嗌救命！高高在上的政府一個官僚指令，立即人人要關門，完全冇收入，但卻要日日交租，交水電保險，俾人工強積金……

　

　　飲食、零售、旅遊、運輸、美容、健身……全部跪低，紛紛微弱地哀鳴：「各位高官，可否俾條生路行吓，我哋絕對願意做足安全措施，完全願意遵守限聚令。可否俾個機會復業？否則，一個斷氣連鎖慘況很快出現……」

 

今天香港，失業率飛升，執笠舖處處，政府能做甚麼、會做甚麼，一定要給市民知悉，不可只佛系地見步行步。

　

　　不能講出口是：「你班由我們供養的薪高糧準高官，可知市民大眾痛苦難當？究竟可否有丁點同理心呢？」

 

高官與政治人物，要得到大眾支持，必須時刻有同理心，真正做到「與民同行、同呼吸」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票