愛國還愛國，投資還投資

　　上周四晚，年初七，回復四人一枱，宴會廿人可開。於是，召集老同學團拜。

　

　　大家六十幾邁向七十，話題當然圍繞仔女、健康及投資。全部既屬退休人士，投資當然非常保守。因揸住的乃是養老金（棺材本），靠佢過世，唔增加不會死，因減少或冇咗就……

 

養老金俗稱「棺材本」，萬萬不可胡亂冒險。

　

　　我一向做法，簡單。早早死慳死抵供滿自住物業，撳地游水。即促盡買政府年金，保證自己離世前「月月有糧出」，且銀碼穩定。然後，再買穩健股票幾隻，揸個天長地久。條件是：一、市場領導者；二、無論經濟如何，市場永在；三、絕少甚至冇競爭對手；四、管理層無法上下其手，有鮮明遊戲規則；五、政府政策「錫晒」，永遠「保護」；六、善待小股東，必定有息派。

 

我愛香港，瞓身年金，月月出糧至上天堂為止。

 

　　哪幾隻股有以上條件，大家做吓功課，動下腦筋一定知，唔使我教。

　

　　當然，穩健投資大法，是一買就不能多心多手炒出炒入，有閒錢只加碼而不要做甚麼「止賺」的投資行為。

　

　　聚會晚上，小弟一再公開個人投資心得，席中有位大N，喊咁口回應：「阿碌，本來，我投資的原則，與你一模一樣。不過，四隻股上市開始揸咗近十五年，仍血本無歸，未知幾時見家鄉噃！」

　

　　原來，慘情。因N佬經常強調自己愛國，連投資都愛國行先。所以，國家發行股份，佢就走去認購。除支持國家外，當然，更諗住搭一轉中國起飛直通順風車啦。結果，佢買咗以下四隻：

　

　　一、中國銀行（3988）——上市價$2.95（1/6/2006）

　

　　二、中國中鐵（0390）——上市價$5.78（7/12/2007）

　

　　三、中國鐵建（1186）——上市價$10.7（13/3/2008）

 

由上市開始投資「中鐵建」者，不知何時才能見家鄉。

 

　　四、中國交通建設（1800）——上市價$4.6（15/12/2006）

　

　　「阿碌，以上四隻，你堅持的六大條件，好似有齊喎，點解呢？」

 

愛國是高尚情操，投資是弁利行為，勿混為一談。

 

　　「N佬，我的條件，只合買港股。因香港公司，以資本主義形式運作，政府冇SAY！一定要以股東利益先行。你買的，是『國家股』。咁，就要肩負『國家任務』。不少決定為『國家行為』。例如投資一帶一路建設，冇得賺都要瞓落去。國家機構要錢，非百分百安全都要借……明嗎？」

 

投資香港公用「鐵股」，永遠安心。

「一帶一路」投資是「國家戰略行為」，不是個別公司的「賺錢行為」。

投資要認清楚那些股有「國家任務」，最好避開。

 

　　總結，愛國還愛國，投資還投資。絕不可混淆！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】東南亞藝術市場是下一個熱點？一探各地獨特及吸引之處！► 即睇