切忌自己扮專家

　　近日，朋友碰頭，必問我：「碌Sir，打唔打？打邊隻？book咗未？幾時打？……」

　

　　當然，是「關心」我的「疫苗」決定。美其名「關心」，其實是八卦。兼且，想引導我跟隨佢的決定(唔打或打邊隻）。

　

　　故此，當我講出：「將會book，會打XYZ！」時，對方就會長篇大論，想大力影響。

　

　　真係多餘。呢個世界，太多一知半解的塘邊鶴。所有資料，多屬道聽塗說或聽網上及社交媒體的「南國先生」亂噏，然後扮權威去勸人。

　

　　小弟決定打邊隻。其實，思考過程極簡單。就是信專家。包括自己認識的藥劑師、衛生專家及各類專科醫生。

 

新冠疫苗有幾款，大家宜就自己年紀、病歷、體質，徵詢專家，應選哪種。

　

　　聽完佢哋分析後，更重要一環，再睇睇佢哋自己打邊隻，就最穩陣嘞。

　　（最新情況：搞笑，我雖決定打，但最終被拒絕，暫時冇得打，因負責注射的私家醫生指小弟屬長期病患者（三高）及正在服用精神情緒科藥物，有點兒冒險！）

 

特首及高官，基於「政治正確」，當然要選科興！市民則可自由選擇。

　

　　這個，有似醫生自己有病要施手術，搵邊個？法官家人犯刑事案，要搵大狀，搵邊個？總之，專家自己出事點解決，方法最值信賴！

 

觀察專家個人出事時的選擇，最具「啟發性」！例如醫生要做大手術，法官家人犯法要找大狀辯護，找誰？「誰」就是「最佳選擇」。

　

　　講到「扮專家」，真的是非常普遍現象。尤其病人，最易受假專家誤導，反而不信真專家。

　

　　你我他身邊，一定有人不時亂噏。尤其：「西藥好多副作用㗎，免得過，唔好食呀！好傷身㗎 ！」

　

　　小弟認識的，十個中起碼一半會信上述亂噏。於是，將醫生處方的藥，只食一半，以免有太多「副作用」。

　

　　咁就出事！尤其血壓藥，個別病人中風原因，正正是未能控制血壓出事！

　

　　老友「仁醫Y」，曾任公立醫院院長，也是肝病專家，正曾遇上一個誤信旁人亂噏的女病人L，幾乎失掉生命。

　

　　L患上自體免疫性肝炎。本來，服用一個療程類固醇，多數會藥到病除。

 

醫生配藥，乃根據病人情況、體質及需要而定，病人必須跟足服用，才能藥到病除。

　

　　豈料，覆診時，驗血發覺肝功能全無改善。Y醫生經驗豐富，一望L面孔，即問：「你究竟有冇按指示食藥？」

　

　　有此一問，因類固醇會引起病人水腫，臉部明顯變圓，出現「月亮臉」。L並冇這種變化。

　

　　果然，原來，又係自己扮專家及聽人亂噏出事。L身邊的無知損友竟建議改信中醫。然後，西醫覆診時就只驗血睇報告，處方的類固醇全拋掉。結果？L的病情不但沒改善，更險些闖大禍。幸Y醫生發現得早，嚴加斥責再用藥補救，終於救回一命！

 

我2015年正是私下減血壓藥份量及黑暗早看手機，導致眼中風，悔恨難返。

　

　　各位退休老友，我哋或多或少有長期病，一定要跟醫生指示食藥呀！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇