抽足七筒血

　　上周標題《完美的退休丈夫》，文章上載當日，真巧合，立即俾我撞正一個《不完美的退休丈夫》。

　　場面背景為伊利沙伯專科門診二樓，此層乃抽血中心，日日朝早八點半已人山人海，幾百個醫生指定空肚抽血者，全部晨早來排隊。排隊人士，十之八九屬長者（睇樣，全部已退休），個個擺明「老顧客」，對規矩非常清楚。

伊利沙伯醫院每天皆人山人海，尤其抽血部門，晨早已打蛇餅。

　　但每次，總有三幾個「博懵者」。呢類病人，毋須空肚抽血，故預約時間是在十點半後。但個別可能心急，照樣八點半來排。

　　QE抽血有限額有程序，第一批先抽空肚病人。完後，第二批才輪到毋須空肚病人。若後者打尖，等於做成前者抽血安排大混亂。

　　故此，排隊時，工作人員會逐一檢查預約文件。次次如是，總會抽出幾個打尖者。工作人員見怪不怪，只以專業態度禮貌忠告：「你的抽血時間是十一點後，食完早餐先嚟啦！」

作為病人，應該感激每日為我們勞心勞力的醫護人員，絕對不應無禮對待。

　　大部分打尖者「衰咗」後，都會尷尷尬尬離隊。但今次撞正個核突佬死(舌累)：「都排緊咯，有乜所謂喎。」

　　家有家規，國有國法，若咁都得，必定群起指責醫管局。於是，工作人員用強硬語氣回應：「唔得！醫院規定，麻煩你立即離開。」

　　呢位《不完美的丈夫》旁邊有個《完美》的太太相勸：「食完早餐先返嚟啦！做乜硬要打尖喎！」

　　眾目睽睽下，核突佬被老婆一窒，即扯火：「打乜尖啫，抽早兩個鐘使死咩」。然後轉身向工作人員爆粗：「XXXX！」

講粗口不是罪行，但只應在私人地方及不應用來攻擊別人。

　　此時，小弟實在睇唔過眼，挺身熄火，細細聲同佢講：「阿伯，你睇牆上，寫明嚴禁粗言穢語。你咁鬧職員，犯法㗎！我會上法庭做證人㗎！」

醫院範圍內絕不可以粗言及暴力，犯法行為也。

　　一講犯法，加上眾人的怒目，《不完美丈夫》終於淆底，死死氣口噏噏離開。

　　事實，多年下來觀察，呢類博懵者，十之八九為老男人，點解呢？

　　當日，小弟按醫生指示，第一次咁重鎚，嘩，抽足七筒血！驗乜？血糖、膽固醇、肝功能、三脂甘油酸……外，有項叫「Cardiac Risk」，直譯就是「心臟危險」。執筆此刻，報告未出，稍後見醫生就知結果。

一次抽足七筒血，問你怕未？

　　我抽血時，前面有個老男人勁搞笑，都幾十歲嘞，但怕針怕到標尿咁款，一面抽一面嗌：「姑娘，好痛呀！」

原來很多男人是怕打針的，包括猛男成龍，佢曾親口向我承認。

　　我都在抽緊，真係，痛乜鬼呢？

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。