《Make Money》篤信風水大鬥法？商業世界的堪輿學！

 

　　不論做生意、開幕儀式、婚嫁、生子等等，中國人必定搵風水師擇個好日或者佈個靚局，呢一點係香港嘅商業社會都可以體驗到堪輿學係幾咁盛行。今集「Make Money」我哋一齊睇吓，究竟香港人有幾咁篤信堪輿，而堪輿又點幫大家Make Money啦！

（Shutterstock圖片) 

 

匯豐銅獅重新開光有運行？

 

　　匯豐總部底層一對「大銅獅」成為公司標誌，不過今年元旦，銅獅被火燒，直到近日先修復重開，「閉關」期間，匯豐有咁衰得咁衰，股價下沉、暫停派息，甚至有人話都係因為關銅獅嘅事。

 

　　銅獅有無咁大威力呢？首先你要知道點解門口要擺獅啦！其實獅子係外國產物，早期傳入中國後，演化成一種神獸，名為「狻猊」，通常會放屋企或鋪門，主要通常都係地點附近嘅路面煞氣大，例如路面三尖八角、車來人往咁，放對獅子係門口就有鎮宅、闢邪、擋煞作用。所以其實銅獅坐鎮匯豐８５年，見盡風風雨雨，重開係咪等於有運行呢？係堪輿學角度，靠對獅子擋擋啲煞氣啊嘛，信則靈囉！

 

江湖傳聞，中環風水大鬥法！

 

 

　　中環從來都係香港商業嘅黃金地段，篤信風水嘅香港人又點可能放過呢個戰場呢？不論係生意上定係風水上，都係「贏到盡」。最出名就係匯豐總行大廈、中銀大廈及長江中心三間大鬥法啦！

 

　　風水學上有句話叫：「要發達，鬥三煞！」意思就係想生意暢旺的話，只要鬥贏煞位就可財源滾滾，而匯豐總行大廈對面嘅尖沙咀本身三尖八角咁，衝正匯豐大廈而且殺氣騰騰，所以兩隻「銅獅」鬥贏呢個煞之餘，隔離個皇后像廣場都有化煞作用，亦都可以解釋到匯豐早期點解蒸蒸日上；直到中銀大廈出現，形象好似菜刀嘅「三面刀刃」，正好對正匯豐大廈總部，煞氣漸強且劈正總部，所以匯豐就係總部頂起兩支大砲型建築物，與中銀形成「刀炮之戰」，從而化解。

 

　　到90年代，「超人」李嘉誠就係兩棟大廈中間興建「長江中心」，有傳係風水師建議下，長江中心以四方柱體為設計，好似一個密不透風嘅堡壘，將呢啲刀刀炮炮反彈開晒，唔知係咪因為咁，所以誠哥生意越做越大呢？不過呢場風水大鬥法鬥足３０幾年，三間企業成績係點就有目共睹。

 

 2021辛丑年房地產仍撐起，辦公室西北破財放麒麟擋災！

 

　　

　　講咁耐風水，梗係要同大家預測下來年運程啦！下年就係辛丑年，係八運嘅最後一個土年，房地產事業相信都係繼續炒來炒去，雖然未必房價大升，但房地產不論二手炒賣定一手買賣仍有小蠅小利；去到2024年就係屬火九元運起，屆時科技、娛樂事業當道，而家手持科技股可能要等多陣啦！

 

　　至於明年辦公室應該放啲乜好呢？睇返九宮飛星圖，破財位（七赤破軍星）係西北方，做生意最忌破財啦，可以係屋企或者辦公室放隻麒麟擋煞；正西方就係正財位（八白佐輔星），如果西邊係門口就放紅地毯，如果窗口位或者牆就可以放件貔貅；但假如係做偏財生意呢，由於偏財位（六白武曲星）係間房中間，所以催旺佢的話可以放個八卦鏡係頂。

 

　　大家謹記，堪輿學術並非科學，只係畀大家參考參考，有云：「四積陰德五讀書」，想炒股做生意樣樣好，梗係要做多啲善事同增進知識，睇我哋Make Money就啱啦!

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇