《MakeMoney》全城潮玩NFT，藝術變虛幣資產成大趨勢？

 　　近來大家都接觸虛幣多咗，開始都知道咩係「比特幣」、「以太幣」啦？不過原來當中核心技術「區塊鏈」仲有好多大用途，近期藝術界都興起一股「NFT藝術潮」，究竟虛幣同NFT有咩關係？點解藝術界又會同虛擬貨幣扯上關係？投資NFT回報又會唔會好高呢？今集MakeMoney同大家深入淺出解釋下咩叫NFT啦！

 

 （Shutterstock圖片）

 

NFT　=　一張獨一無二的身分證

 

　　係虛擬貨幣技術入面，除咗提及「區塊鏈」之外，仲有分「同質化代幣」（fungible token）及「非同質化代幣」（non-fungible token）。所謂「同質化」即係發行一模一樣嘅代幣，特質就係每個幣嘅幣值一樣、可互相替代、可被切割，例如比特幣、以太幣、萊特幣等；而「非同質化」即係每一個代幣係獨一無二，無法切割或者替代。

 

　　不論同質定非同質化代幣，當佢產生嘅時候，就會有一條10幾個位嘅「條碼」記錄在案，全世界人都可以睇到，而呢個條碼就會記錄係「區塊」之內；每當產生一次新交易，區塊又會多一條「條碼」出現，一環扣一環，形成一個不可更改嘅「區塊鏈」啦！而藝術行業就係睇中NFT「不可更改」同「獨一無二」嘅特性，可以為每個藝術發行一個獨立嘅「代幣」，呢個代幣某程度上就等於一張身分證，可以查看邊個擁有過，幾時做過交易。

 

電子藝術作品可買賣，成交價驚人！

 

  （Shutterstock圖片）

 

　　過往係電腦入面創作嘅藝術作品，由於容易被人複製關係，所以價值不高，只有觀賞價值；但自從有NFT出現，就算藝術作品可以被複製，但張身分證係獨一無二，令電子藝術作品價值大大提高！NFT可以應用係數碼圖像、畫作、音樂、短片、遊戲、動畫等等，甚至你Facebook上面一個Post，都可以被人拎嚟製造NFT再去轉售，真係「萬物皆可NFT」。

 

　　被製成嘅NFT仲有一樣好處，就係交易成本唔貴！過往藝術作品要進行交易，又要經拍賣所，又要經銀行交收，途中有幾多人「過河濕腳」真係唔識計；而NFT藝術作品都只要擺係網上拍賣，唔需要經歷第三方認證，交易時候只要繳交Gas Fee作為產生區塊鏈嘅成本，快捷又方便。由於呢項技術都係新興無耐，不過近期作品成交價驚人！例如 CryptoPunk嘅數碼頭像最貴成交價高達758萬美元（約5874.5萬港元），較早時更有一幅數碼拼貼畫作拍出6934萬美元，真係嚇死人！　　

 

作品價值難以衡量，天價接貨值唔值？

 

  （Shutterstock圖片）

 

　　藝術作品拍賣，作品價值通常都由估值人員根據市場價值而定；不過NFT作品點定價，完全係由賣方同買方自己擬定，究竟係買貴定買平咗真係無人知，所以呢一期經常聽到有NFT以天價成交，究竟值唔值就真係見仁見智，畢竟心頭好係無價寶，不過接得貨就存在一定風險。

 

　　好似Coinbase創辦人Fred Ehrsam就預計，有九成NFT會係3至5年內變得一文不值，因為呢一波NFT突然湧出，就好似1990年代有大量科網公司出現，不過呢堆公司都係有價值。言下之意，即係Fred Ehrsam都認為，有好多NFT都係因為潮流關係而被炒高，係咪真係值的收藏就要自己好好考慮啦！

 

撰文：李皆穎

 

 

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇