《MakeMoney》特斯拉仲追唔追得過？可能今日高位明日低位！

 　　仲記得上年《MakeMoney》出過篇文，講過要買特斯拉嘅三個理由，如果有跟到，一年後今日已經升左四倍啦！不過自從特斯拉股價破千美元之後，有唔少人開始問要唔要高追好呢？但學連登仔話齋：今日高位明日低位！所以今集我地做個大總結，睇下特斯拉係目前水平仲追唔追得過，而且仲可以飛到幾遠啦！

 

 

Hertz已陸續收到車，馬斯克話未簽約

 

　　第一個利好因素，就係特斯拉近期收到國際租車公司Hertz張「大訂單」啦，而且係講緊10萬架電動車，假設全部都係Model3，講緊係近300億港紙收入，真係肥過肥仔水；而Hertz亦表示，公司已經開始陸續收到Tesla交付，更表示好多租客都喜歡Tesla車款，睇得出係汽車租賃市場上Tesla車款需求旺盛，真係長做長有！

 

　　不過，馬斯克早前係自己推特上表示，Hertz仲未同特斯拉簽約，並指Hertz並唔會因為大訂單而得到優惠。不過大家好似闊佬懶理咁，因為都知道佢一向出開口術，佢係推特上講過啲乜，大家都係開心下就算，一切都要以官方發布為準。不過，呢張大訂單相信會為特斯拉帶來顯著收益，加上特斯拉係上海廠房已開，產能已經加大，唔少車主反映，對比起美國制，上海制Model3價錢更平，但質量更好！

 

手持比特幣，特斯拉帳面又贏

 

　　係特斯拉第三季盤數，顯示因為持有虛擬貨幣而需要作出5100萬美元減值，大家都知道好特斯拉好大機會係持有比特幣以及狗狗幣。不過呢兩三個月比特幣破頂再破頂，所以假如特斯拉無出過貨，呢一波升幅好大機會係年尾入帳，到時候特斯拉盤數又會好睇啲，如果破頂出貨，收入又大增，股價破多幾次頂啦！

 

　　不過，最近馬斯克係虛擬貨幣方面又出　口術，先有人係特斯拉官網發現接受比特幣同柴犬幣（SHIB）嘅指令碼出現，等人以為係咪馬斯克已經放棄左佢嘅摯愛狗狗幣（Doge），雖然後來指令碼就刪除左Shib，但已經惹起疑團；其次，大家雖然睇到馬斯克好似想開始接收比特幣作為付款方式，但由於近期比特幣價格波動，係咪可以真係用作接受汽車付款呢？如果一個屈尾十比特幣穿5萬美元，咁咪有排輸？

 

大氣候支持電動車，但仍有問題商榷

 

 

　　雖然好多地方都支持電動車發展，而且有部分國家已經開始電動車普及化藍圖，不過係物理方便電動車仍有一些瓶頸。如果打開連登討論區汽車台，就發現特斯拉普遍問題就係「入電位」唔足夠，買電車第一個問題就係究竟附近有無足夠充電無，如果無就肯定令人卻步。

 

　　第二個問題就係，充電由20%至80%最起碼要半小時，雖然呢個速度已經好快，但對比起燃油車幾分鐘入好油仍有距離；內地其實已經有電動車係支持「換電派」，時間同入油差唔多，不過市場普及度不足。如果想Tesla可以再普及化，唔知係入電速度方面會唔會再有更多提升呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

•