《經濟不停學》「港版納指」快滿月！緊貼科技有「錢」途

　　有「港版納指」之稱的恒生科技指數面世快將一個月，而被納入嘅３０隻股份喺呢個月都有升有跌，究竟投資者想入手科網股時，又應該有咩要注意呢？

 

（Shutterstock圖片)

　
科指股比例不同，指數升跌要睇「大佬」

 

 （Shutterstock圖片)

 

　　恆生科技指數同恆指一樣，每隻成分股都有自己嘅佔比，而佔比最重嘅五隻股份分別係阿里(09988)、騰訊(00700)、每團(03690)、小米(01810)同埋舜宇(02382)，佔比分別為8.53%、8.52%、8.33%、8.11%及8.02%。所以喺參考科指時候，都要衡量埋呢幾隻大佬表現啦！

 

　　至於恒指公司嘅選股準則係乜呢？據了解，呢次選股涵蓋五大行業，包括資訊科技、非必需性消費、工業、金融及醫療保健。而納入準則就係：必需喺本港主板上市；符合換手率要求嘅大中華公司；有無利用科技平台營運等因素。最後篩選出３０隻市值最大嘅科技股，成為「恒生科技指數」啦！另外，科指設有「快速納入機制」，只要新股上市市值喺現有指數股入面排前十，去到第十個交易日收市後就會被納入，唔使再等季檢！

 

由科指面世至今日中午收市的科指股累積升跌表現（按號碼排序）(資料來源：經濟通）

 

遲來的科指，仲有無得追？

 

 （Shutterstock圖片)

 

　　又係時候同大家上下歷史堂，納斯達克指數(NASDAQ)創立於1971年，成分股必須喺納斯達克交易所上市，並根據市值權重來劃分股份佔比，但當中有成2700間公司，真係有時候睇到眼殘；所以大部分人都比較留意NASDAQ100指數，即係100隻比較大嘅納指股份，成分股包括亞馬遜、蘋果、谷歌A等，都係一?美國龍頭大哥品牌為主。

　　至於香港科指股種類複雜，其中包括手機設備、芯片、手遊、軟件、平台等唔同公司，當中逾九成都係中資，有業內人士曾經質疑，內地都比香港更早有「科創板」，加上香港本身都有「創業板」，而家先嚟整個「科技指數」追唔追得切呢？事實上，設立唔同類型嘅指數係為咗方便投資者同基本可以清楚咁了解市場動向，畢竟恒指都係以傳統舊經濟為主，未必能完全反映資金走勢；加上本港股市已經設立「同股不同權」，加埋科指呢個因素，以及香港上市成本較低，有機會吸引到世界各地嘅科技公司來港上市！　

　
傳統股睇業績，科技股睇未來

 

（Shutterstock圖片)

　　其實唔少朋友對於科技股一頭霧水，皆因科技股難以用傳統PE、EBITDA呢類技術指標去衡量。不過要揀隻好股又唔係咁難嘅，最緊要記住口訣：「傳統股睇業績，科網股睇未來！」意思就係舊經濟股通常以經濟周期、公司業績、國家政策等因素主導股價，而科網股就以世界大趨勢為炒賣點，要搵好股就要知道目前潮流Hit緊乜嘢、了解最新科技行情。

　　最簡單，科技股分硬件、軟件為主，投資者應該搵自己嘅興趣去了解。而硬件股又細分芯片、手機設備、顯示卡為主，可以留意行業最新技術突破、產品出貨量等因素；軟件就有遊戲、系統程式、客戶服務等等，多數要參考活躍用戶人數、同時線上人數、軟件獨特優勢去衡量股價。

　　講咁多，其實都係想話畀大家知，係現時ＡＩ同高科技工業時代，科網熱潮只係剛剛開始，買賣科網股唔只剩係睇圖睇市況睇經濟，最緊要貼實科技同生活嘅大潮流，咁至了解間公司做緊Ｄ乜，係咪真係有前景同「錢」景。每日都要Update自己，揀好靚股，股價就會日日Up啦！不過，追科網股也要小心留意股價有無炒過燶，最經典的例子如一代巨頭IBM，其現時股價就較2012時低了足足逾四成。

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票