《經濟不停學》做公司債主好威威，點避垃圾債慘慘豬中伏？

　　香港債劵孖屐唔活躍，唔係政府每隔幾年就出一次iBond，債劵話題都幾難出現喺顯眼位置，其實債劵同股票一樣都可以有息收，不過要承擔嘅風險同擁有嘅權利就好唔同，亦同樣有方法分辨邊隻債買得過。

 

（Shutterstock圖片）

買債劵等於做公司債主，債息股息有不同

 

 （Shutterstock圖片）

　　首先，債劵同股票投資者對一間發債機構嚟講，角色係好唔同，債券係一種債務工具，目的係要投資者借錢畀發債機構，啫係公司嘅債主；普遍而言，公司到時到候就會畀息同支付合約承諾嘅金額，就等同找數；相對嚟講，股票投資者理論上係上市公司嘅「老細」，派股息嘅目的係分紅畀投資者。

 

　　債券都分好多種，基本嘅有啲係有到期日，公司按講好咗嘅利率定期畀息，到期還番本金，iBond就係呢類；有啲無到期日，叫永續債券，啫係畀息畀到天荒地老，一世唔還本金，當然部分公司會設條款，可以隨時買番張債券；仲有一款叫常見叫「可換股債券」，即係去到到期日前，債主原則上可以用低於市價嘅價錢，用「以債換股」方式換入公司股份。

 

人有三六九等，債券保障程度分先後？

 

 

（Shutterstock圖片）

　　人都有分三六九等，更何況債券呢？債券梗係有分級數，優先債（或叫優先票據）係高級過普通債劵乃至次級債，事關一個唔好彩當發債公司破產，最先可以拎返錢嘅係持有優先債嘅債權人，之後再到其他債劵同股東；仲有呀，債劵持有人多數唔會有投票權，雖然話如果有公司派息派走晒錢的話，拎住債劵嘅好似乜都無咁；但假如佢唔到時到候還錢，債主同樣都可以按照當地法例，向公司申請清盤，係有機會追返數！

 

　　另外，公司債券嘅入場費多數好高，閒閒地由三幾十萬至三幾百萬都有，所以啲證券經紀同銀行多數會Sell債券基金，入場費低啲之餘，基金入面有多種債券，可以分擔風險呀嘛，當然，Fund佬都要收番啲管理費啦！

 

 

債劵評級睇清楚，玩垃圾債要小心

 

 

（Shutterstock圖片）

　　買債劵無乜驚，最驚就係發債機構頼死唔還錢或者根本還唔起錢（啫係債務違約），到時要追數，分分鐘要打官司申請清盤，嘥時間兼嘥錢，好麻煩㗎。

 

　　至於點樣分邊啲債券買得過？依家多數係靠三大信用評級機構標準普爾、穆迪同惠譽做評級，「AAA／Aaa」代表信貸風險微不足道；「AA＋／Aa1至BBB－／Baa3」代表風險極低至適中；「BB＋／Ba1至CCC－／Caa3」代表風險顯著至極高；「CC／Ca至C」代表處於或接近違約狀態，仲有機會收得番錢；「DDD／SD／C至D」代表已經違約，要有心理準備收唔返。

 

　　成日聽到嘅垃圾債（Junk Bond），就係指一啲信用評級好低嘅債券，多數用高利率嚟吸引人落搭，所以投資果陣真係要睇清楚，容乜易得不償失。

 

撰文:吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

•