《小傳日記》今日政府大搞北部都會區簽署儀式，首先嚟個實地考察，然後就齊齊輪流畫龜。差唔多各大企業都有派人到場，除咗各大地產商、內房企業之外，仲連公用類別例如煤氣（００００３）都有份到。但係喺今日咁重要嘅時刻，新世界（０００１７）又走出嚟搶鏡。　　　對上一次政府開開心心歡迎大熊貓到港，同日新世界大龍鳳上畫，被視位已經接棒嘅鄭志剛辭任ＣＥＯ，孖屐普遍認為係為負債不斷而孭鑊走，同日就宣布由前發展局長馬紹祥接任ＣＥＯ。當時有新人選之後仲令股價單勁升兩成。但估唔到兩個月後嘅今日，新世界大龍鳳就上映第二季，做咗無耐嘅馬紹祥據報唔撈。　　　噚晚新世界宣布以４﹒２億銀賣所持嘅啟德體育園７５％股權畀阿媽周大福企業，股價半日都唔係點郁，但到下晝忽然急插，原來《彭博》報道馬紹祥最快將會喺今日宣布辭任ＣＥＯ，隨後無耐就連同系新世界百貨（００８２５）一同停牌。　　　停牌後有本地行家報道，ＣＥＯ個位將會由現任執董兼新世界中國ＣＥＯ黃少媚接任。黃少媚２０１５年加入新世界做新中副ＣＥＯ，２０２０年坐正，據報已經有２０年房地產經驗，長期擔任神州基建規劃等等顧問工作。講番北部都會區，新世界喺度有大把棕地儲備，黃少媚就被視為新世界開發北都嘅大元帥。　　　收市後新世界正式公布，上述人事變動全部成真。黃少媚點解上任唔難理解，但既然都早知道北都正式上馬，點解唔一開始由黃少媚坐正，要由馬紹祥做呢兩個月嘅「臨時」ＣＥＯ？新世界公告無特別提到馬紹祥辭任原因，只係提到「以便處理其他個人事務」，唔講清楚就更加耐人尋味。但ＣＥＯ不停換，反映公司權力體系唔夠穩定，唔會係好事，股民無安全感如同驚弓鳥，今日一有傳聞就跌夠６％，以後再有咩戲劇進展難免再跌多一鑊，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票