和她一直不算稔熟，只是朋友聚會中有過數面之緣，最近聽到關於她的私事，才知道性格看似直率的她，其實是位人妻情場高手。

　　「最近聽講佢分居喎...。」友人F說。

　　「係呀，初時佢話同老公性格唔夾，後尾先知原來係識咗有錢人。宜家佢全身名牌，成日係IG曬禮物，出入有車，個男人仲租左間新屋畀佢，完全升『呢』啦。」G旋即答話。

　　G接著把這個婚後騎牛搵馬的故事說下去：她素來對錢銀斤斤計較，平時會佔朋友便宜，一起吃飯、酒錢，只會收多不會收少，朋友間對她的評價早就不太好，搵朋友著數後，她亦愛攀附有錢男人「黐飲黐食」。一直見錢開眼亦嚮往高等生活，只是多年來苦無機會，才在30歲時向現實低頭，嫁給了現任老公，婚後和丈夫家人擠在公屋的她一直頗有微言，只是沒經濟能力搬出去自住。想不到事情有「轉機」，她最近終於搭上筍盤，能過著更上一層樓的生活，身為人妻又如何，她二話不說便找個理由和丈夫分居，旋即箝實有錢新歡搬進私樓同居。

　　「佢老公呢，唔知咩？」我問。

　　「佢老公完全唔知架，信佢話想冷靜分開下先，仲等緊佢回頭。」

　　人望高處嘛，只是誰都不知會否「高處不勝寒」，她不敢肯定新歡的喜愛能維持多久，就怕這邊廂和丈夫正式斷纜，另一邊廂又失去新歡寵愛和一張長期飯票，豈不是兩頭不到岸？！她不肯向丈夫交代自己早已變心的實情，更不願意釐清關係。

　　「佢一直都搵理由推搪老公，更加話唔會正式簽紙離婚架，有咩事仲可以有個退路，重投懷抱嘛！」

　　有趣的是，平時看來直腸直肚的她，愛把自己打造成是個三觀正、充滿正義感兼用情專一的人，興趣是高談闊論、道德評價別人的感情、家事。嘿，誰知道她才是箇中的感情高手，婚後為錢見異思遷，拋下丈夫卻又遲遲不肯「放生」，心機和手段比誰都高招， 識玩原來是要留定備胎呀！

　　難道騎牛搵馬是邁向更好將來的一個方法？好高騖遠的人敵不過銀彈的魅力，變心是遲早的事，但處理好身份有很難嗎？！