半年零收入 領9千蚊援助金 黃夏蕙︰我無幾億身家

　　【晴報專訊】黃夏蕙前日自爆領取演藝人協會派發的9,000元援助金，但有網民質疑「富貴長者」夏蕙BB根本沒此需要。昨日黃夏蕙接受《晴報》電話訪問，自爆近半年零收入，即使收取援助金後，亦會繼續派口罩及防疫物資，善心爆棚。

（左起）魏秋樺、徐寶鳳及黃夏蕙開心領取援助金。

　　不少圈中人陸續收到演藝人協會派發的援助金支票，包括黃夏蕙、麥長青（麥包）及劉錫賢等，眾人在社交網貼相，答謝會長古天樂的支援。黃夏蕙前日上載與魏秋樺及徐寶鳳的合照，留言說︰「寒天飲冷水，點滴在心頭！一直被人話『藝人無情』！呢句說話錯晒！我噚日（前日）同一班好姊妹去香港演藝人協會，領取咗一筆抗疫基金，每人9,000蚊，呢份心意，係用言語表達唔到，只可以喺內心深處感受到，呢一杯暖水嘅溫暖。古天樂，我哋一齊愛死你！」

繼續自費派口罩

黃夏蕙是圈中出名的「慈善家」，經常自發行善。

　　不過網民指本身有米的黃夏蕙，何以要領援助金，她即回應：「我會送番畀有需要嘅人身上。」她昨日接受本報電話訪問，表示近半年圈中不少台前幕後停工：「藝人好慘，真係手停口停，就算有政府派嗰一萬蚊都幫助唔大。好多呢行嘅人半年無嘢做、無收入，仲點維持生活？」

　　黃夏蕙坦言自己無工開︰「雖然未至於一餐都無得食，但真係一毫子收入都無。」對於有網民質疑她要領取援助金，她無奈說︰「我又唔係古天樂嗰啲大明星，又無幾億身家，我只係普通平民。同埋我成日做公益慈善，之前真金白銀訂啲口罩、米、防疫用品派畀人。（嬲網民？）唔緊要，幫到大家就OK，嗰9,000蚊又唔係淨係畀我，我會繼續派口罩同防疫物資，預計派3,000份。」

轉載自: 晴報