簡淑兒 怕醜小花成長記

　　【晴報專訊】擁有一雙招牌「腰果眼」的簡淑兒（Jessica）笑容甜美，被觀眾封為「宅男女神」，雖然從事幕前工作，但原來Jessica性格極度內向，連搭小巴嗌落車也不敢，若非簡媽媽當年為她報名選港姐「練膽量」，她也不會因此入行，亦認識不到男友麥大力。

 

Jessica甜笑時展現一雙「腰果眼」，因而獲封宅男女神。（IG圖片）

 

　　外形甜到漏的簡淑兒，在美國讀大學時主修心理學、副修美術設計，及後在北京清華大學報讀半年工商管理課程。Jessica因極怕陌生人，加入娛樂圈全是無心插柳。「我2012年去選港姐，完全因為媽咪。當時我喺北京讀書，媽咪知道我性格好怕醜，覺得我將來工作會有啲蝕底，所以想我去見識下壯下膽，就叫我家姐幫我報名（選美）。」

 

2012年，Jessica鼓起勇氣選港姐，可惜20強不入。

 

搭小巴不敢嗌落車

 

 

　　過往的Jessica原來宅得驚人，「我係嗰種買快餐都會驚嘅人，其實我最唔鍾意搭小巴要嗌落車，真係好驚好驚，每次搭小巴，我都好希望有人會同一個站落車，咁我就唔使大嗌『有落』。」不過她當時竟沒有抗拒媽媽的提議，決心回港選美，「當時我唔想留喺北京讀書，所以我唔會話媽咪迫我選港姐，而係因為佢，我先有勇氣。」但她選美期間怕醜依然，「我好早已經out咗（落選），我記得當時要學上台點講嘢，然後講『多謝』再落台。我好記得導師同我講『死得啦，你未上台已經腳震震，到時點上台呀？』我聽到好唔開心，因為真係唔係我在行嘅嘢，我真係好驚，應該成個人空白咗，依家諗番，上唔到台都未必係一件壞事。」

 

 

 

　　Jessica認為參選港姐是人生中很重要的經歷，「由一開始，我無諗過入呢一行，到我選完港姐入行，我又鍾意喎；後來唔知點解做做下主持，又有人搵我加入組合『少女標本』，其實我都無諗過自己會做歌手唱歌；後來又有人搵我拍劇，我諗番起都覺得好好彩。」她自言是「緊張大師」，在主持、歌手及演員三個身份之間，她尤其喜歡演戲，「因為做主持或者歌手，大家都會留意我嘅一舉一動；但係演戲嘅時候，大家都唔係望緊我，因為我係演緊嘅係另一個人。」

 

Jessica平日做運動減壓，更操出結實腹肌。（IG圖片）

 

與麥大力拍拖感幸福

 

Jessica與麥大力（左）因合作拍綜藝節目《SUPER FIVE》撻著。（IG圖片）

 

　　工作以外，Jessica的減壓方式包括做運動、欣賞畫展等，「因為我好鍾意畫畫，做啲唔係對住人嘅嘢，我會輕鬆啲。」入行多年，Jessica雖然已比以前外向，但始終和家人一起，才是最自在。談到因合作拍節目而結緣的男友麥大力，Jessica笑說︰「喺佢面前，我會比較小朋友，唔需要太硬淨、堅強，可以做番一個簡單啲嘅細路女，咁樣我已經覺得好幸福。佢比較成熟啲，年紀比較大，會明白事理，好多嘢唔需要解釋，加上大家都喺外國長大，想法都差唔多。」認定男友是結婚對象？「我哋未必咁快去傾結婚話題，因為我哋一齊都只係兩個月，咁早去講呢樣嘢都係壓力，順其自然啦，依家相處開心，我已經覺得好好。」

 

 

為「膠面」演出解畫

 

Jessica在《智能愛人》中飾演機械人，最困難是不能眨眼，講對白不能帶感情。(網上截圖)

 

　　最近，Jessica在劇集《智能愛人》中飾演兩個不同版本的智能機械人，她笑言甚有挑戰性，「主要嘅挑戰係講嘢同肢體動作，正常講嘢我會郁下手，又會有尾音；但演機械人時，所有動作都要好定，唔可以眨眼，講嘢無尾音，用詞唔可以太過人性化，所以比較難。」她在劇中挑戰侍應、看護等不同造型，「開工第一日就要被人爆樽，因為爆樽時好近塊面，導演仲叫我試下唔好眨眼，好大壓力。」結果她被刮損左邊面，令她十分擔心，「因為當時仲未拍完，夾硬補啲粉遮住，我好驚傷口發炎同留疤，好彩好快無事。」不少觀眾看過Jessica的演出後，都覺得她有點「膠面」，Jessica解釋︰「其實我哋想角色外形嘅機械感重啲，所以我塊面打咗一層『令』嘅嘢上去，仲有閃粉，每次化妝要三個鐘，同拍古裝劇差唔多。」

 

Jessica早前在《一笑渡凡間》中因愛成恨化身成女妖，表現獲觀眾讚賞。

 

轉載自: 晴報

• 

【etnet 30周年】多重慶祝活動一浪接一浪，好禮連環賞！ ► 即睇詳情