學生時代頑皮事 陳家樂︰偷聖誕樹裝飾被記缺點

　　【晴報專訊】莘莘學子開學不久，在疫情下回到校園，與同學們相處、面對面聽老師上課，都是難得的事。一眾離開校園已久的藝人，分享他們學生時代的點滴也特別興奮，尤其是外表斯文的陳家樂，竟曾試過在學校三樓跳落二樓，雖然最後能瞞天過海，但最後卻因偷聖誕樹裝飾而被記缺點。

 

說到自己的百厭行為，家樂即滔滔不絕。

 

　　陳家樂形象健康，看似是品學兼優的學生，但他笑稱求學時曳事做盡，他憶述︰「我中學嗰時係運動愛好者，最鍾意跑跑跳跳，有日有個同學話由學校三樓跳落二樓平台，直頭係挑戰體能極限…有同學一支箭跳咗落去，我諗咗好耐，最後都跳咗。其他同學跳完無事，反而我就拗柴。好彩嗰次無人發現，其實真係好危險，大家千祈唔好學。」

 

家樂十分好動，經常玩水上活動。

 

　　家樂續說︰「有次臨近聖誕，同幾個女同學行過一棵聖誕樹，有人慫恿我拎走樹上面嘅掛飾，我二話不說就拎落嚟。原本以為無人知，點知第二日早會，主任喺廣播公開有人偷聖誕樹吊飾，仲開名係我，結果換嚟一個缺點。」

 

何依婷︰老師激發努力讀書

 

何依婷形容她的中學校風比較純潔。

 

　　選美出身的何依婷，原來也曾是一名曳學生，她回想中一至中三讀書成績差，每日只顧打機，但因為老師一句說話，她開始努力讀書︰「有年家長日，老師同爸爸講『以佢嘅成績應該讀唔到佢想揀嘅科。』就係呢句說話令到我突然間發憤，『我就讀畀你睇！』」

 

何依婷早前擔任今屆港姐的導師，用心教導師妹。

 

　　何依婷感激老師的激將法，讓好勝的她每日放學都專心溫習，「結果高中嘅成績升到全級40幾名，已經有好大進步。諗番以前成日掛住打機都覺得好無聊，好彩我嘅努力並無白費，最後都成功升上大學。」

 

呂慧儀︰怕做壞事被發現

 

呂慧儀經常提醒自己行為要檢點。

 

　　外表斯文的呂慧儀，讀書時期已經是一名乖學生，她笑謂︰「細細個我已經好正直，傻下傻下咁。好多小朋友都試過出貓，但我一次都未試過，我份人好細膽，成日驚做壞事會被老師發現，所以我嘅讀書生涯都係平平穩穩，成績未必係最好，但總算交齊功課。」

 

　　呂慧儀稱小時候家教很嚴，媽媽經常教導她要嚴選朋友、用心讀書；而就讀的學校校規也相當嚴謹，所以同學們都很聽話，最曳只是把校裙改短和遲交功課而已。

 

呂慧儀和兒子「蟹籽」的感情要好。

 

丁子朗︰「幫」同學做功課

 

丁子朗讀書時期最愛做功課。

 

　　樂於助人是良好品德，但丁子朗中學時卻喜歡「幫」同學做功課，他自知是反面教材，但他解釋︰「我都唔只幫一個同學，反正用電腦做，唔會認到字跡，咁咪幫幫手囉。同學都好識做，每次我幫佢哋做完功課，都會請我食嘢，我咪當呃餐飯，哈哈！」

 

　　丁子朗指他曾多次幫同學做功課，從未被發現；他又得戚表示上課時就能做完所有功課，放學便可以去玩。至於有否試過出貓？丁子朗說︰「啲人抄我就差唔多！（你成績應該好好？）正常咁啦。」

 

余德丞和丁子朗早前拍攝劇集《青春不要臉》，重新穿起校服。

 

轉載自: 晴報

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票