昨日政治局召開會議，強調要促進房地產市場止跌回穩，對商品房建設要嚴控增量、優化存量、提高質量，加大「白名單」項目貸款投放力度，支持盤活存量閒置土地。要回應群眾關切，調整住房限購政策，降低存量房貸利率，抓緊完善土地、財稅、金融等政策，推動構建房地產發展新模式。
　　雖然有大行發表報告，認為中央政治局周四會議提出嘅一系列房地產相關舉措仍不足以實現當局為樓市「止跌」目標。如要實現止跌目標，中央政府可能要充當房地產市場「終極買家」，需要喺加大財政支持力度、穩定房地產市場，財政和房地產方面推出「救市」實際舉措。
　　不過市場一於少理，噚日（26日）內房股藉勢熱爆，多隻股份升幅超過兩成，當中世茂(00813)更飆近四成。世茂今早暫時升2%，同其他內房股相似，暫時升幅相對溫和，反觀佳兆業集團(01638)，噚日只係升12%，今日突然神勇，最多飆69%，不但冠絕同行，同時升上港股所有類別升幅榜首位。唔通資金輪流炒？
　　講起佳兆業集團，不得不提其傳奇歷史。雖然佳兆業規模不算大，但當年發展進取，喺一眾同行中知名度不低。集團喺2009年上市，上市價3.45銀，雖然頭幾年股價反覆，但派息唔差，所以吸引一批著重收息嘅散戶。可惜好景不常！2014年12月初，集團旗下位於深圳多個樓盤遭到國土局鎖定禁售。同月集團出現重大人事變動，公司創始人郭英成辭任執行董事、董事會主席等職務，翌月佳兆業就被媒體指可能出現債務危機，咁算唔算係房企債務危機嘅始祖？同年3月，集團被港交所勒令停牌，當年大家都以為復牌凍過水，點知停牌約兩年之後又戲劇性順利復牌。而且復牌第一年，股價接連創新高，搞到唔少人大跌眼鏡。
　　高峰時，佳兆業集團股價6.91銀，以現時股價約0.204銀計，市值蒸發約97%。而家中央暴力救市，今日股價最多升近七成，係唔係心郁郁？買唔買得過就要睇你心態了，就如博客之前講過，如果覺得小注碼風險承受得起，當係過大海博殺心態無妨。但今日升咁多，等回調返多少先入。如果因為今次中央托市，睇好內房短期炒作，都係買番國營背景房企，始終有實力穩陣啲，買完唔使心慌慌。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情