自從特朗普再次當選美國總統後，比特幣價格愈升愈有。比特幣今早再創歷史新高，據幣安數據幣價暫高見10.66萬美金刷歷史新高，現報10.53萬美金，按日升3.52%。以太幣今早同樣突發破位，現報4000美金，按日升3.03%，一星期以來再度重上4000大關。比特幣價格上升，除帶動相關ETF全線急升之外，持有比特幣或其他加密貨幣嘅公司同樣受益。包括博雅互動(00434)就是近期受益者之一。

　　據博雅互動11月29日公告表示，公司累計持有約3183個比特幣，每個平均持有成本約5.77萬美金。以今早比特幣價格10.53萬美金計算，每個帳面利潤約4.76萬美金，換言之，該批比特幣帳面利潤暫時約值1.52億美金（約為11.8億港銀）。

　　只不過，集團股價近期升幅實在太驚人。今日最高炒到5.96銀，直逼6銀。以10月31日收市價1.83銀計，不足兩個月累升2.2倍，若以今年年頭1月30日收市價0.513銀計，至今累升10.6倍，環顧魚缸，仲有邊一隻股票威過佢？

　　升咗咁多，仲追唔追得過？博客真係唔敢答，事關魚缸炒作嘅嘢好難講。加上股價而家同比特幣掛咗鈎，筆者自問唔係比特幣專家，真係唔敢下判斷。不過，睇番博雅旗下嘅手遊《德州撲克》、《鬥地主》同埋《四川麻將》，話就話係皇牌遊戲，但都算唔上係自家IP，手頭揸住大把現金唔係攞去開發遊戲而係炒幣，咁請問投資者又有咩必要買你隻股票呢？市值已經咁高企啦，直接炒幣會唔會更加直接？

　　不過，要留意一點，集團中期純利2.84億人仔，高過首三季度純利2.12億人仔，因為第三季度蝕咗7200萬人仔。倘若虧損趨勢持續至第四季度，則全年純利有機會進一步下跌。所以，現時低市盈率可能維持唔到。另外，比特幣後市點行仍難判斷，係繼續創新高？定係回吐？相信股神都答唔到，而且要投資比特幣概念股都唔止佢一家，京基金融國際(01468)今日話要設投資委員會關注加密貨幣機遇，今早股價升咗少少，話唔定係下一隻賺錢大王，比特幣仲有得升嘅話。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇