《開市Ｇｏｏｄ　Ｍｏｒｎｉｎｇ》香江魚缸終止六連升。早段曾上過１８４００點樓上，但其後由升轉跌，目前９天ＲＳＩ升至７３，處於超買水平，出現回調亦係預料之內？不過成交仍有１２００幾億，收市微跌１１點，企穩１８２００點水平，市底似乎未算太差，唞完氣後有望再向上挑戰？　　人行時隔逾７個月重啟１４天期逆回購，操作量７４５億元人仔，中標利率下調至１﹒８５厘。利率對上一次下調係農曆新年前，今次就係國慶假期前，都係季節性現金需求較大嘅時期，放水俾銀行，都係正常及意料之內嘅操作？毋需過份放大相關利好？　　小米（０１８１０）今日股價跑贏大市，升逾３巴仙。近期小米頻頻傳出好消息，包括８月手機全球銷量超越蘋果排第二、加快發展智能駕駛業務等，以及周四（２６日）晚亦會發布Ｒｅｄｍｉ　Ｎｏｔｅ　１４系列產品。股價已突破前一個反彈浪嘅高位（２０﹒３５元），等炒埋新手機發布嘅消息後，投資者好大機會趁高位沽貨？　　聽日（２４日）《開市Ｇｏｏｄ　Ｍｏｒｎｉｎｇ》搵嚟輝立證券董事黃瑋傑，同大家分析上述股份及大市走勢！歡迎大家提問投資及其他股票問題。記得準時８：５５ａｍ，昅實《經濟通》ＮｅｗｓＴＶ直播節目－－《開市Ｇｏｏｄ　Ｍｏｒｎｉｎｇ》喇！或者ｃｌｉｃｋ入嚟ｈｔｔｐｓ：╱╱ｗｗｗ﹒ｙｏｕｔｕｂｅ﹒ｃｏｍ╱ｗａｔｃｈ？ｖ＝５ＢｏｉＪＹ５４ＲｚＥ打個卡先又得！

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇