《小傳日記》騰訊音樂（０１６９８）啱啱出咗份業績報告，總收入去到７０﹒２億元，同比增長６﹒８％。最值得留意嘅喺在線音樂訂閱收入同在線音樂付費用戶數都齊齊上升，前者同比升咗２０﹒３％，後者同比增長咗１５﹒５％。之前個個都話要消費降級，點知原來大家竟然都仲有閒情逸致去充音樂會員，感覺受到背刺！　　　講到騰訊音樂嘅業績，總收入同比增長６﹒８％至７０﹒２億元人仔，調整後淨利潤同比增長２９﹒１％至１９﹒４億元人仔，而最值得一提嘅係平台超級會員數量超１０００萬，喺音樂版權「去獨家」時代錄得呢個表現算係標青。　　　三家大行對騰訊音樂都有唔同睇法，但整體上都係幾樂觀嘅。高盛話，騰訊音樂第三季嘅業績基本符合預期，預計下季度同明年都會繼續穩定增長。佢哋仲認為，騰訊音樂喺付費用戶同每用戶平均收入（ＡＲＰＵ）方面有好多進步空間，睇好２０２５年音樂收入增長１５％。匯豐則話，騰訊音樂第三季收入按年增長７％，但淨利潤比預期低咗啲，因為行政費用高咗，不過都繼續俾「持有」評級。花旗就講，騰訊音樂第三季收入增長６﹒８％，符合市場預期，收入同毛利率都幾符合預計，淨利潤仲高過預期，依然俾「買入」評級。　　　不過，神州串流音樂平台好難出海同海外巨頭競爭，業務性質本身所限又冇辦法做大個餅，好難對市場描繪藍圖。於是騰訊音樂當然都要「社交」化，加入大量社群交流元素，增加用戶黏性，「順便」賣下廣告，只不過音樂得聲無畫，又點比得過有聲又有畫嘅抖音同快手（０１０２４）呢？從業績嚟睇，其社交娛樂板塊移動端月活用戶同比大跌三成，可謂潰不成軍。　　　值得一提嘅係，騰訊音樂除咗要面對蝦米音樂、網易雲音樂（０９８９９）、Ａｐｐｌｅ　Ｍｕｓｉｃ等等老對手競爭之外，最近市場上又多一個不速之客，就係抖音系嘅汽水音樂。汽水音樂雖然音樂版權少，但勝在以超低價格吸引客人轉會，而家汽水音樂喺各類Ａｐｐ下載榜單上都超越同行，唔少人高呼「彎道超車」。神州互聯網市場幾近進入存量博弈時代，串流音樂Ａｐｐ除咗要提升音質之外，減價戰未來都好難避免喇，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇