十位閨蜜的窩心時刻

 

　　人類先天就具備愛的本能。活到某個歲數，我們自然開始懂得分辨友情和愛情。然而，如何經營一段關係，卻要從千千萬萬次錯摸之中學習。儘管常常徘徊在錯對之間，但他們至少也有這麼一次令女伴銘記於心……

 

　　A：「以前未結婚，我同男友每晚都會約定臨瞓之前通一次電話，我瞓上床之後，佢就會喺電話唱Moon River畀我聽，唱完先至收線瞓覺。呢個習慣維持咗好幾年，直到我哋結婚初期都仲Keep住唱㗎！」

 

　　B：「我最難忘係以前嘅同居男友好鍾意幫我吹頭，佢好想好似Hair Stylist咁幫我吹到好靚好整齊，但其實佢只係亂撥一通囉……哈哈！不過都無所謂嘅，咪當自己係膠公仔頭，畀佢練習吓囉。」

 

　　C：「我中六嗰時嘅男友係我同班同學，大家住同一個屋邨，所以每日返學放學都會一齊。有時夜晚我話肚餓，佢都會做『外賣仔』買宵夜送上嚟我屋企，其實大家都係想搵藉口見吓對方。」

 

　　D：「我男朋友唔係嗰種識搞驚喜、搞浪漫嘅人，但其實佢都算係一個暖男嚟！拍拖初期我哋每次去街佢都孭住個背囊，我好奇怪男人唔係袋住銀包鎖匙喺褲袋就出門口㗎咩？後來我終於知道，原來背囊入面一直袋住件風褸，其實係為我準備㗎，因為佢怕我出入冷氣地方會冷親！」

 

　　E：「我結婚個花球，係我老公親手整㗎！因為佢聽我講過花球嘅傳統其實係由男方送去畀女方，之後佢就決定親手造，仲不斷上YouTube睇短片跟住學。雖然佢只係識揀一啲好普通嘅花，手藝又未到家，但當我見到自己個花球時，心情真係好激動。比起其他千篇一律嘅款式，我個花球先至係世上獨一無二。」

 

　　F：「我諗唔到有邊一個時刻係特別窩心！但我男友係一個好孝順、好錫老人家嘅人。阿媽教落，揀男友要搵個識得尊重長輩嘅，咁就代表佢家庭觀念重，會好好照顧屋企。所以每次見到佢同老人家相處得好好，好溫柔，我都會Picture到我哋將來成家之後父慈子孝嘅畫面，我好期待呢一日！」

 

　　G：「我性格屬於火爆衝動型，我老公就剛剛相反，好有耐性。試過有一次因為工作唔如意，我瞓到半夜突然詐醒咗，覺得好唔開心想呻吓，所以叫醒咗老公逼佢同我傾偈。第二朝大家返工都冇晒精神，但喺困難時候有老公行動上支持，都總算好安慰。」

 

　　H：「當聽見我話鍾意睇魔術，我男友就專登去學咗一招半式表演畀我睇！我開心嘅係佢會記得我講過嘅嘢，而又會暗地付諸實行。」

 

　　I：「臨結婚前有一晚，我老公好煞有介事咁同我講，叫我叮囑姊妹們喺接新娘遊戲時唔好求其上網搵段《愛的宣言》逼佢讀。佢話因為有啲內容太誇張，現實生活無可能做到，咁就變相向我講大話，同埋實踐唔到承諾。我啲姊妹們聽到之後都好羨慕我有個咁好嘅老公！」

 

　　J：「未同我拍拖前，我男友係一個又煙又酒又賭錢嘅人，我都解釋唔到自己當時鍾意佢啲乜。但佢為咗同我一齊，決心戒晒所有陋習。嗰刻我終於相信，原來愛情係會令到人有所改變，會開始去諗將來。以前嘅佢，可以只係等緊一個付出嘅機會；遇見之後，我哋嘅人生先至真正開始。」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情