唔記得幾時開始，走喺新聞最前線嘅，除咗一般記者，仲多咗一大班大台嘅《東張西望》攝製隊，近年佢比自己台嘅新聞部走得更加前，更加遠添。

 

      日本九州中部連日發生大地震，熊本縣、大分縣等多地受嚴重破壞，香港有唔少傳媒都有派人去當地採訪，（又或者係撞啱記者放假去日本旅行，順便去影幾個shot返嚟），呢啲去外地嘅assignment，而家大台就唔興新聞部派人去採訪，而係由收視分分鐘高過三線劇嘅《東張西望》去拍攝。但係一班網民睇完特輯唔滿意，上網大大力鬧爆，真係難服侍啦！

 

 

　　事緣喺特輯期間，藝人主持李旻芳同攝製隊去到重災區益城町，故事講到佢哋唔係好夠食物，想搵間超級市場補給，買啲嘢食，但因為地震，超市一早已經被當地災民搶購一空，當佢哋諗住空手而回時，有一位日本嬸嬸見到佢哋咁慘，冇嘢食，就送咗幾個飯團俾佢哋。重點係，成程拍低晒。AMAZING！主持人攞咗飯團之後，不停同嬸嬸講多謝，之後就對住部CAM表揚日本人好有人情味，好似仲感動到有啲眼濕濕！

 

 

       網上一班廢青真係好冷血，剩係諗到一啲好現實嘅問題，鬧爆李旻芳等人變相搶咗災民手上僅有嘅資源，又鬧爆佢哋準備不足，明知災區情況都仲係帶咁少嘢食。真係太現實啦！人哋事後都講咗啦，只係想顯示日本人係幾咁重情，《東張西望》本來就係一個重情嘅節目，由碼頭工潮俾HIT總經理嚴磊輝盡訴心中情，去到舊年播出進擊的肖友懷同佢婆婆喊苦喊忽，再加上呼籲所有離巢藝人返嚟TVB呢個家庭，幾咁溫情呀喂！！嬸嬸送飯團呢一幕係幾咁搭調，貫徹一路以嚟嘅作風！最重要嘅係，人哋攝製隊都冇食到啲飯團！啲飯團出現咗喺鏡頭前面之後，李旻芳就（聲稱）送返俾嬸嬸啦！

 

 

       咁......係囉......咁當初攞啲飯團嚟做咩呢？「唔知呀，感動呀嘛，人情味緊要過飯團味！」

 

 

      其實喺節目出街前一晚，台灣《蘋果日報》已經有記者舐咗嘢，有兩名去當地採訪嘅突發組記者跟災民條隊攞嘢食，影咗張攞住嘢食開心笑嘅相send返去台灣主管，該名突發組主管承認一時疏忽災民悲哀情緒，寫咗一篇報道講記者攞到嘢食，重將照片當成配圖，俾台灣網民插爆，搞到突發組要出聲明道歉。

 

      《東張西望》就冇道歉啦，只係李旻芳喺自己facebook回應網民留言解釋，又話事前已經熟知安全細則，亦都盡量冇打擾災民等等等等，話佢哋團隊會反省。

 

 

      呢個節目自從去年底改革後，比過往更進一步加重時事成份，成為咗「偽新聞節目」嘅典範，報道時旁白會加好多感情落去，同埋好多引導性嘅問題，等觀眾一聽到之後，不期然就會心底裡面彈出一句「啊！又係喎！佢又講得啱喎。」好多時點出咗個問題，單故仔完咗交返俾主播之後，主播就會加一兩句總結，例如如果單故仔報道舊區重建苦主嘅慘況，主持人就會話：「嗯，希望呀羅生就唔好唔開心啦，盡快攞到應得嘅賠償，重過新生活。」另一個就會接：「係呀！重過新生真係好重要，我哋跟住就睇吓Kelly陳慧琳為個唱點樣操一個新形象啦。」以上呢個係作嘅，同現實中佢哋啲TAG相比，雖不中亦不遠矣。

 

 

      佢哋亦都好強調主持人喺故仔嘅角色，因為主持人本身就係藝人，個節目係俾佢哋增加曝光嘅機會。絕對就唔係記者，希望佢自己都唔好搞錯，因為記者嘅一個重要潛規則，係自己唔會成為新聞裡面嘅一部分，更加唔會係主角。李旻芳呢，就係演活一個blogger嘅身份，喺成隻地震故仔裡面，不停穿插佢喺災區行走嘅畫面，又見到佢戴住個頭盔，走入去一啲搖搖欲墜，或者已經冧咗嘅廈裡面睇受損情況，再加埋呢一幕送飯團起碼。嗰種求真嘅精神係幾值得敬佩嘅，但係有冇諗過一旦有餘震，喺唔夠防護裝備嘅情況之下，係咪反而增加受傷風險以及救護員負擔？「唔知呀，夠感動呀嘛！」咁，就唔該開宗名義講明自己係一齣實況劇集啦。

 

 

      都係嗰句，以上我係用咗新聞節目嘅標準去睇，我輸咗，因為我太認真。講到尾，呢個只係一個好似好認真嘅綜藝節目，主持人係會化行晒粧出鏡，例如舊年鉛水風波，我哋同唔少行家都見到佢哋一隊crew係幾咁浩浩盪盪喺啟晴邨游走，主持人、camman、導演、燈光、場務、化粧，起碼都六至七個人一齊出CREW做一單故仔。其他電視台新聞部呢？記者、CAMMAN，有時搭多個工程，用嘅資源分別喺邊，一眼睇晒。而大家亦都明白，點解大家質疑，大台竟然係派一個花瓶去報導，而唔係派有專業新聞知識嘅人去採訪啦！

 

      但其實都已經慣啦，呢個台就係有唔係新聞嘅「新聞節目」、有亞視劇集為主嘅「經典台」以及唔係俾香港人睇嘅簡體字新聞，仲未慣咩？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇