兩年半前，香港金鐘，添馬公園變電站。一個暗角，一部攝錄機，一個疑犯，兩個袖手旁觀的警員，五對拳腳，四分半鐘的私刑毆打。黃絲帶極度憤慨，更痛恨警察；藍絲帶為私刑喝采，認為為警隊出口氣。因為雙方都超越了法律的界線，令本來分明的是非對錯，都被拋諸腦後，變成一場純粹發洩情緒嘅爭拗。呢一件大事，成為咗警民關係永遠難以彌補嘅裂痕，兩派價值觀分野，亦都持續到今時今日。 

 

　　曾健超向警員倒液體，喺舊年5月被判襲警罪成，判囚5星期，正等候上訴。法庭判七警罪成，七人全部被判囚兩年，律師考慮上訴。事後，以某知名藍絲導演「高智」森為首的網絡文革隊，瘋狂辱罵法庭，有藍絲專頁更指名道姓指法官杜大衛為「黃絲狗官」。到今朝，有其中一名藍絲被拍低喺區域法院外手持杜大衛嘅相，用棍打落去。

 

　　喺呢刻，我哋更需要冷靜去睇呢件事。兩邊各被判有罪、獎門人式「打和」嘅結局，係合情合理合法，因為兩邊都各自為自己嘅行為負上責任，我哋唔能夠只睇是但一邊嘅判決，就大肆慶祝或者大力撻伐，否則我哋就會跌入思想嘅盲點中。 

 

　　正如兩個月前，梁游一案裁決，我已經寫下一段文字，預示佢哋會有幾雙重標準。當日，一眾藍絲熱烈慶賀法院裁定梁游二人喪失議席，盛讚法官英明神武；今日，佢哋立即變臉，潑婦罵街，法官嘅裁決、判詞、以至族裔都成為佢哋針對嘅對象。

 

　　無錯，人係有言論自由，但佢哋自己都成日口口聲聲話言論自由係有限度嘅，第一個龍門已經被佢哋搬走咗。另外，以往有本土派網民喺光復行動示威人士被判案後，對裁判官起底、辱罵，咁呢個就等法庭去視乎情況，決定係咪要指控佢哋係藐視法庭。正如今次司法機構自行出聲，表示對情況高度關注，已轉交律政司跟進一樣。

 

　　撐警藍絲又點只呢班出嚟做小丑嘅嘍囉？梁美芬自反佔中開始一直係藍絲心目中嘅英雌，佢認為七警並非故意，係受環境刺激而打人，更反問點解會有香港人唔同情呢班警員；何君堯更勁揪，話覺得七警對曾健超嘅行為係「小懲大誡」。有呢兩位咁尊重法律嘅律師做我哋嘅立法會議員，真係香港之福。

 

　　事件嘅核心，我認為係呢一眾藍絲根本就唔係擁抱法治、擁抱治安，而係認為治亂世必用重典，而呢一套重典，係唔需要跟程序、跟法律去行，佢哋認為，將香港變成為一個警察國家，就係最好嘅一件事，即使滿街私刑，「你唔去得罪佢哋咪得囉！」

 

　　擁抱私刑嘅呢種意識，存在喺撐警人群當中，我哋都仍可以視之為群眾效應，但係當呢一樣嘢蔓延到執法者，就好危險、令人心寒。警務處處長盧偉聰繼承前任禿鷹「你哋無做錯到」嘅風範，喺聲明第一句就話對七警罪成嘅裁決感到難過，又話明白同袍嘅憂慮。我真係完全唔明白，憂慮啲咩呢？你哋警隊而家有好多人動用私刑嘅咩？點解有咁清晰嘅證供，仍然要定調七警嘅行為係伸張正義？

 

　　身為警隊工會阿頭嘅警察隊員佐級協會主席陳祖光就講得更加直接，話呢個罪成嘅裁決，同佢喺學堂學到嘅法例有唔同，原來學堂教警察係應該執行私刑，咁睇嚟我哋香港係用緊公帑，培育緊一班好危險嘅人出嚟。

 

　　支持同袍，同袍會好感動嘅，但係講嘢之前，唔該用吓個腦，如果唔係，講咗啲不能說的秘密出嚟，就唔好啦。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情