《Online有話兒》賀錦麗單挑彭斯，副總統辯論邊個贏？

　　早幾日侵侵（特朗普）大戰Sleepy Joe（拜登），無幾耐侵侵就中招新冠肺炎，但三日就出院，真係「奇蹟」啦！不過今日焦點就係落係副總統辯論上，由賀錦麗單挑彭斯，唔知你又覺得邊個贏呢？

 

 

賀錦麗先出招，指責侵侵政府係史上最大的失敗

 

 (Shutterstock圖片)

 

　　新冠疫情搞到全球中招，而美國都死咁多人，民主黨梗係拎住呢樣嘢攻擊侵侵政府啦：

 

　　「特朗普明知呢個疫情，但反而去隱瞞佢，所以本屆政府嘅無能，令到美國已經犧牲２１萬人，美國人見證了我哋歷史上所有總統執政以來最大失敗！」

 

　　賀錦麗一嚟就出招咁狠，彭斯梗係反駁，話對家拜登同賀錦麗嘅抗疫都係抄侵侵政府，不過抗疫嘅嘢大家都係差唔多，有話邊個抄邊個咩？賀錦麗呢次攻擊力強啊！

 

經濟議題彭斯發威，指特朗普在任令人民收入上升！

 

 (Shutterstock圖片) 

 

　　作為專業生意人，侵侵在任確實令到美國經濟略有起色，而且股市連番破頂，呢一點真係無得講，所以彭斯都捉住呢點攻擊對方：

 

　　「特朗普任內，令人民收入上升；而拜登上台反而令稅收增加，市民擔子只會更重！加上拜登上台後，會禁止壓裂方式（Fracking）開採石油，簡直就係損害美國就業市場。」

 

　　賀錦麗只係回應指會好好善用稅收，幫助低收入民眾，而拜登更加唔會禁止壓裂方式開採石油。不過侵侵就火速係推特貼出賀錦麗早前斬釘截鐵咁話「上任第一天就會禁止壓裂採油」嘅影片，果然有備而來！

 

中美問題難判高低

 

 (Shutterstock圖片)

 

　　兩位參賽者就中美問題爭論得臉紅耳赤，因為自中美爭端開始之後，兩國經濟都明顯睇到有損失，賀錦麗就捉住呢點攻擊對手：

 

　　「特朗普政府明顯係貿易戰中輸咗，而加美國失去大量職位，農夫們又破產，好多美國人下個月租金都交唔到，國民經濟係納入災難！」

 

　　不過彭斯反指，拜登從政多年都未處理過中國問題，先係令到美國失去就業機會嘅主因，彭斯又指疫情問題，都係靠特朗普先可以力挽狂瀾。不過呢個問題真係難以判斷兩位參賽者高低，疫情又未完，中美又衝突緊，豈能蓋棺論定呢？

 

　　呢次辯論，睇得出大家氣氛相對平靜，未係好似上次咁， 劖亂歌柄情況唔太嚴重，大家係各個議題上都互有攻勢，我嘅評語係：「打和啦！Super！」

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情