梁潔華6月13日設靈 悲痛黃日華選大戲服陪葬

　　【晴報專訊】黃日華太太梁潔華七年前患上急性骨髓性白血病，日前因器官衰竭離世，終年59歲。因太太離世而悲痛欲絕的黃日華，昨日偕女兒黃芷晴為愛妻辦理身後事，透露太太於下月13日設靈，翌日出殯，他選定愛妻生前的大戲服裝作陪葬品。

 

黃日華昨日與女兒黃芷晴辦理太太梁潔華的身後事。

 

　　黃日華與女兒黃芷晴昨日下午到紅磡世界殯儀館，手持文件的黃日華面容憔悴，雙眼明顯哭得非常紅腫，黃芷晴則默默陪伴爸爸，兩人大方讓傳媒拍照。喪妻後首次見傳媒的黃日華透露會與女兒互相扶持和照顧︰「我哋兩個都OK、堅強。」

 

黃芷晴想媽媽來世做女兒

 

黃日華哭得雙眼紅腫，令人心酸。

 

　　問到梁潔華臨終前有何遺言？黃日華指太太最擔心女兒︰「始終阿女未嫁人，不過阿女大個，佢應承媽咪會照顧我，我同佢講『你放心啦，阿女長大喇，我唔會照顧佢，佢反過來照顧我』，仲有佢媽媽（外母）我哋一定會照顧。」黃日華坦言一家人有幾年時間去適應，亦已接受事實︰「我同阿女都知道，呢日始終會來臨，我哋坦然、堅強去面對。」

 

黃芷晴答應媽咪梁潔華會好好照顧爸爸。

 

　　黃日華透露太太的最後日子並不痛苦：「彌留嗰陣，痛苦已經過晒，因為器官衰竭。（已經昏迷？）可以咁講，佢走得好舒服，我哋同佢講嘢時，感覺到佢係笑住走。」問到芷晴對媽媽的承諾，她忍不住落淚，又表示暫未夢見媽媽：「不過見到有飛蛾，好似識聽我哋講嘢唔走。」提到芷晴在社交網撰文，希望媽媽來世做自己的女兒，芷晴補充說：「係媽咪話嘅，佢話一生咁辛苦照顧我，放棄事業都係為咗我，希望我可以做佢個角色，同佢交換。」

 

　　兩父女在殯儀館逗留約三小時，黃日華離開時表示，太太定於下月13日設靈，翌日出殯，喪禮將採用香港創價佛教及火葬儀式。他說：「到時會放多啲太太鍾意嘅大戲衫同飾物做陪葬，靈堂布置就清淡簡潔為主，想畀人舒服嘅感覺。」

 

轉載自: 晴報

•